ഇനി കാറ്റ് അഴിച്ചുവിടുന്നത് ഒന്ന് കാണട്ടെ; പണിമുടക്കിന് നഗരമദ്ധ്യത്തിലൂടെ കുതിര സവാരി നടത്തി യുവാവ്; അന്തംവിട്ട് സമരക്കാരും പോലീസും

ദേശീയ പണിമുടക്കിന്റെ ഭാഗമായി കേരളത്തിൽ ഇന്ന് ഹർത്താൽ ആചരിക്കുകയാണ്. കടകൾ മുഴുവൻ അടച്ചിട്ടും വാഹനങ്ങൾ നിരത്തിൽ ഇറക്കാതെയും ഇറക്കി വാഹനങ്ങൾ തടുത്ത് നിർത്തിയുമാണ് സമരക്കാർ ഇന്ന് സമരം ആഘോഷിക്കുന്നത്. ഇതിന്റെ ഭാഗമായി സംസ്ഥാനത്ത് വിവിധ ഭാഗങ്ങളിൽ സംഘർഷങ്ങളും പ്രക്ഷോഭങ്ങളും നടന്നു. കടയുടമകളെ മർദ്ദിക്കുകയും വാഹനങ്ങൾ തല്ലി തകർക്കുകയും ചെയ്തു. ഇതിനെല്ലാം കാവലായി പോലീസും മുന്നിലുണ്ട്.

അതിനിടെ പോലീസിന്റെയും സമരക്കാരുടെയും മുന്നിലൂടെ ഒരു കൂസലുമില്ലാതെ യാത്ര ചെയ്യുന്ന ഒരു യുവാവിന്റെ വീഡിയോയാണ് വൈറലാകുന്നത്. നഗരമദ്ധ്യത്തിലൂടെ കുതിരപ്പുറത്താണ് ഇയാളുടെ പോക്ക്. തൊപ്പിയിട്ട് കൂളിംഗ് ഗ്ലാസ് വെച്ച് ബാഗും തൂക്കിയിട്ടുള്ള യുവാവിന്റെ യാത്ര പോലീസും സമരക്കാരും നോക്കി നിൽക്കുന്നത് വീഡിയോയിൽ കാണാം. ജീൻസും ഷർട്ടുമാണ് യുവാവ് ധരിച്ചിരിക്കുന്നത്.

ഈ വീഡിയോ പ്രചരിച്ചതോടെ പ്രതികരണങ്ങളുമായി നിരവധി ആളുകൾ രംഗത്തെത്തി. കാറ്റഴിച്ചുവിടാനോ കീ ഊരിയെടുക്കാനോ പറ്റില്ല എന്ന കമന്റുകളാണ് വീഡിയോയ്‌ക്ക് ലഭിക്കുന്നത്. തടയാൻ നിന്നവരെ കഴുതകളാക്കിയാണല്ലോ കുതിരയുടെ പോക്ക് എന്ന പ്രതികരണങ്ങളും ലഭിക്കുന്നുണ്ട്.

https://www.facebook.com/Ra5htrawadi/videos/697086324758947/