ലക്‌നൗ: ഉത്തർപ്രദേശിൽ മദ്രസ വിദ്യാർത്ഥികളുടെ ഉന്നമനത്തിനായി കൂടുതൽ പദ്ധതികൾ പ്രഖ്യാപിച്ച് യുപി മുഖ്യമന്ത്രി യോഗി ആദിത്യനാഥ്. മദ്രസ വിദ്യാർത്ഥികളുടെ പഠനത്തിനായി വികസിപ്പിക്കുന്ന മൊബൈൽ ആപ്പിലൂടെ സ്വാതന്ത്ര്യ സമര സേനാനികളുടെ ജീവിത കഥകളും പഠിപ്പിക്കാൻ തീരുമാനം.
മുസ്ലീം കുട്ടികൾക്ക് ആധുനികവും നൂതനവുമായ വിദ്യാഭ്യാസം നൽകുകയെന്ന ലക്ഷ്യത്തോടെയാണ് മദ്രസ വിദ്യാർത്ഥികൾക്കായി മൊബൈൽ ആപ്പ് നിർമ്മിക്കുന്നത്. ഇതിലാണ് ഇന്ത്യയുടെ സ്വാതന്ത്ര്യത്തിനായി പോരാടിയ സ്വാതന്ത്ര്യ സമര സേനാനികളുടെ ജീവിത കഥകൾ പാഠ്യപദ്ധതിയിൽ ഉൾപ്പെടുത്തുന്നത്.
മദ്രസ വിദ്യാർത്ഥികൾ രാജ്യസ്‌നേഹം നിറഞ്ഞവരായിരിക്കാൻ സർക്കാർ ആഗ്രഹിക്കുന്നുവെന്ന് യുപി ന്യൂനപക്ഷ ക്ഷേമ സഹമന്ത്രി ഡാനിഷ് ആസാദ് അൻസാരി പറഞ്ഞു. വിദ്യാർത്ഥികളിൽ ദേശ സ്‌നേഹം ഉണ്ടാക്കുന്നതിനും അവരുടെ മെച്ചപ്പെട്ട ഭാവിയ്‌ക്കായി ആധുനിക വിദ്യാഭ്യാസം നേടാൻ അവരെ സഹായിക്കുന്നതിനുമാണ് ഈ തീരുമാനമെന്ന് അദ്ദേഹം കൂട്ടിച്ചേർത്തു.
കഴിഞ്ഞ ജൂണിലാണ് മദ്രസ വിദ്യാർത്ഥികൾക്കായി ആപ്പ് നിർമ്മിക്കാൻ യോഗി സർക്കാർ സർക്കാർ സംസ്ഥാന മദ്രസ ബോർഡിന് നിർദ്ദേശം നൽകിയത്. പുതിയ അദ്ധ്യയന വർഷം മുതൽ വിദ്യാർത്ഥികൾക്ക് മൊബൈൽ ആപ്പുകൾ പ്രയോജനപ്പെടുമെന്ന രീതിയിലാണ് സർക്കാർ നിർദ്ദേശം നൽകിയിരുന്നത്.പഠന സാമഗ്രികൾ, പരീക്ഷ വിജ്ഞാപനം, ഫലം തുടങ്ങിയ വിവരങ്ങൾ ആപ്പു വഴി വിദ്യാർത്ഥികൾക്ക് ലഭ്യമാക്കും.
