ചെന്നൈ: വിജയ് ചിത്രം ബീസ്റ്റിന്റെ ട്രെയിലർ റിലീസ് മുതൽ ആളുകൾ ചർച്ച ചെയ്യുന്നതാണ് ട്രെയിലറിലെ മുഖം മൂടി വില്ലനെ കുറിച്ച്. മലയാള യുവ താരം ഷൈൻ ടോം ചാക്കോ വിജയ് പടത്തിൽ ഉണ്ടെന്ന് പറയുന്നുണ്ടെങ്കിലും ട്രെയിലറിൽ അദ്ദേഹത്തെ കാണാത്തത് പല അഭ്യൂഹങ്ങൾക്കും വഴി ഒരുക്കി.
ട്രെയിലറിൽ കണ്ട മുഖം മൂടി വില്ലൻ ഷൈൻ ആണെന്നായി പിന്നീട് വാർത്തകൾ. താരം മുഖംമൂടി വില്ലന്റെ ഫോട്ടോ ഷെയർ ചെയ്തതോടെ ബീസ്റ്റിലെ മുഖം മൂടി വില്ലൻ ഷൈൻ തന്നെയാണെന്ന് ആളുകൾ ഉറപ്പിച്ചു. ഗംഭീര മേക്കോവറിനെ നിരവധി ആളുകളും പ്രശംസിച്ച് രംഗത്തെത്തി.
എന്നാൽ ആ കഥാപാത്രം ഷൈൻ അല്ലെന്ന റിപ്പോർട്ടുകളാണ് ഇപ്പോൾ പുറത്തു വരുന്നത്. സ്ലം ഡോഗ് മില്യനെയർ എന്ന സിനിമയിലൂടെ ശ്രദ്ധേയനായ നടൻ അങ്കുർ വികൽ ആണ് മുഖം മൂടി വില്ലൻ എന്ന് ദേശീയ മാദ്ധ്യമങ്ങളടക്കം റിപ്പോർട്ട് ചെയ്യുന്നു. സിനിമയിൽ തീവ്രവാദികളിലൊരാളായാണ് അങ്കുർ എത്തുന്നത് എന്നും റിപ്പോർട്ടുകളുണ്ട്.
ഷൈൻ ആയിരിക്കില്ല മുഖം മൂടി വില്ലൻ എന്ന വാർത്തകൾ പുറത്തു വരുമ്പോഴും ആളുകൾ പ്രതീക്ഷ കൈ വിട്ടിട്ടില്ല. ട്രെയിലറിൽ ഷൈൻ ഇല്ലാത്തത് കൊണ്ട് തന്നെ നടന്റെ കഥാപാത്രം സിനിമയിൽ സസ്പെൻസ് ആയിരിക്കുമെന്ന പ്രതീക്ഷയിലാണ് ആരാധകർ.
നെൽസൺ ദിലീപ്കുമാർ തിരക്കഥയെഴുതി സംവിധാനം ചെയ്ത ബിഗ് ബഡ്ജറ്റ് ആക്ഷൻ ചിത്രം ബീസ്റ്റ് ഏപ്രിൽ പതിമൂന്നിന് ആണ് ആഗോള റിലീസ് ആയി എത്തുക.
Comments