കൊച്ചി: പ്രേക്ഷകർ ഏറ്റവും അധികം കാത്തിരിക്കുന്ന ചിത്രമാണ് കെജിഎഫിന്റെ രണ്ടാം ഭാഗം. ഏപ്രിൽ 14നാണ് ചിത്രം തീയേറ്ററുകളിൽ റിലീസിന് എത്തുന്നത്. ചിത്രത്തിന്റെ മലയാളം പതിപ്പ് കേരളത്തിൽ വിതരണത്തിന് എത്തിയ്ക്കുന്നത് പൃഥ്വിരാജ് പ്രൊഡക്ഷൻസ് ആണ്. കെജിഎഫിന്റെ പ്രൊമോഷന്റെ ഭാഗമായി കഴിഞ്ഞ ദിവസം നായകൻ യാഷും നായിക ശ്രീനിധി ഷെട്ടിയും കൊച്ചിയിലെത്തിയിരുന്നു.
ആടുജീവിതം സിനിമയുടെ ചിത്രീകരണത്തിനായി പൃഥ്വിരാജ് വിദേശത്ത് ആയതിനാൽ യാഷിനെ സ്വീകരിക്കാൻ സുപ്രിയയാണ് എത്തിയത്. കൊച്ചിയിൽ നടന്ന ചടങ്ങിൽ കെജിഎഫ് നായിക ശ്രീനിധിയെ നിർമ്മാതാവ് സുപ്രിയ മേനോൻ അവഗണിച്ചുവെന്ന രീതിയിലെ ചർച്ചകളാണ് സോഷ്യൽ മീഡിയയിൽ തുടങ്ങിയിരിക്കുന്നത്. വേദിയിലേക്ക് സുപ്രിയ എത്തിയപ്പോൾ യാഷിന് മാത്രമെ കൈകൊടുത്തുള്ളൂവെന്നും ശ്രീനിധിയെ അവഗണിച്ചുവെന്നുമുള്ള് ചർച്ചകളാണ് പുരോഗമിക്കുന്നത്.
സോഷ്യൽ മീഡിയയിൽ സുപ്രിയയ്ക്കെതിരെ വലിയ രീതിയിലെ വിമർശനം ഉയരുന്നുണ്ട്. വേദിയിലേക്ക് കയറി സുപ്രിയ യാഷിന് കൈകൊടുത്ത് കഴിഞ്ഞ് സ്വന്തം ഇരിപ്പിടത്തിലേക്ക് പോകുന്നതാണ് വീഡിയോയിലുള്ളത്. പിന്നാലെ വന്ന ശങ്കർ രാമകൃഷ്ണനും അങ്ങനെ തന്നെ ചെയ്തു. തനിക്ക് വേണ്ടി വസ്ത്രം ഒതുക്കി, ഇടം ഒഴിച്ച് എണീറ്റു നിന്ന് സ്വീകരിക്കുന്ന ശ്രീനിധിയേ തിരിഞ്ഞു നോക്കാൻ പോലും സുപ്രിയ തയ്യാറാകാത്തതാണ് വിമർശനങ്ങൾക്ക് കാരണം.
മൂവി ഗ്രുപ്പുകളിൽ പലരും വീഡിയോ പങ്കുവെച്ച് സുപ്രിയയ്ക്കെതിരെ എത്തിയിട്ടുണ്ട്. ഒരു നടിയോടുള്ള അവഗണനയാണ് സുപ്രിയയും ശങ്കറും നടത്തിയതെന്ന തരത്തിലാണ് അഭിപ്രായങ്ങൾ ഉയരുന്നത്. ‘കാര്യം യാഷിന്റെ അത്രയും സ്റ്റാർ വാല്യൂ ഒന്നുമില്ലെങ്കിലും നടിയാ.. എങ്കിലും ഒരു മര്യാദ ഒക്കെ വേണ്ട്’ എന്നാണ് പലരും വീഡിയോ പങ്കുവെച്ച് ചോദിക്കുന്നത്. ഇഗോ ആണെലും അബദ്ധമാണേലും ശ്രീനിധി വേദിയിൽ വെച്ച് അപമാനിക്കപ്പെട്ടുവെന്നും ചിലർ അഭിപ്രായം പങ്കുവെയ്ക്കുന്നുണ്ട്.
