കളിതോറ്റ ദേഷ്യത്തിൽ ഫോൺ തകർത്ത സംഭവം; ആരാധകനോട് മാപ്പ് പറഞ്ഞ് ക്രിസ്ത്യാനോ റൊണാൾഡോ; മത്സരം കാണാനും ക്ഷണം

മാഞ്ചസ്റ്റർ : എവർട്ടണെതിരായ മത്സരത്തിൽ തോറ്റ ദേഷ്യത്തിൽ ആരാധകന്റെ ഫോൺ തകർത്ത സംഭവത്തിൽ ക്ഷമ ചോദിച്ച് മാഞ്ചസ്റ്റർ യുണൈറ്റഡ് താരം ക്രിസ്ത്യാനോ റൊണാൾഡോ. കഴിഞ്ഞ ദിവസം മത്സരത്തിന് ശേഷമായിരുന്നു സംഭവം.

ഒരു ഗോളിനാണ് മാഞ്ചസ്റ്റർ യുണൈറ്റഡ് എവർട്ടണോട് പരാജയപ്പെട്ടത്. ഇതിന് ശേഷം ഡ്രസ്സിംഗ് റൂമിലേക്ക് മടങ്ങുന്നതിനിടെയായിരുന്നു റൊണാൾഡോയുടെ പ്രവൃത്തി. റൊണാൾഡോയുടെ ചിത്രം എടുക്കാൻ ശ്രമിച്ച ആരാധകന്റെ ഫോൺ നിലത്തെറിയുകയാണ് ക്രിസ്ത്യാനോ ചെയ്തത്. ഈ വീഡിയോ വൈറലായതോടെ താരത്തിനെതിരെ വിമർശനവുമായി നിരവധി പേർ എത്തി. എന്നാൽ ഇതിൽ ക്ഷമ ചോദിച്ചുകൊണ്ടാണ് ഇപ്പോൾ താരം രംഗത്തെത്തിയിരിക്കുന്നത്.

” നമ്മൾ അഭിമുഖീകരിക്കുന്നത് പോലുള്ള വിഷമകരമായ നിമിഷങ്ങളിൽ വികാരങ്ങൾ കൈകാര്യം ചെയ്യുന്നത് ഒരിക്കലും എളുപ്പമല്ല. എന്നാലും, ഞങ്ങൾ എല്ലായ്‌പ്പോഴും ബഹുമാനവും ക്ഷമയും ഉള്ളവരായിരിക്കണം, ഗെയിം ഇഷ്ടപ്പെടുന്ന എല്ലാ യുവാക്കൾക്കും മാതൃകയാകണം. അതിനാൽ എന്റെ പ്രവൃത്തിക്ക് ക്ഷമ ചോദിക്കാൻ ഞാൻ ആഗ്രഹിക്കുന്നു. കായികക്ഷമതയുടെയും സ്‌നേഹത്തിന്റെയും അടയാളമായി ഓൾഡ് ട്രാഫോർഡിൽ ഒരു മത്സരം കാണാൻ ഈ ആരാധകനെ ക്ഷണിക്കാനും ഞാൻ ആഗ്രഹിക്കുന്നു.” റൊണാൾഡോ ഇൻസ്റ്റാഗ്രാമിൽ കുറിച്ചു.