എറണാകുളം: കോതമംഗലം വടാട്ടുപാറയിൽ പോത്തിനെ കാട്ടാന കുത്തി കൊന്നു. വീടിനോട് ചേർന്ന് കെട്ടിയിരുന്ന പോത്തിനേയാണ് കാട്ടാന കുത്തി കൊന്നത്.ബുധനാഴ്ച പുലർച്ചെ രണ്ട് മണിയോടെയാണ് സംഭവം. തുമ്പ നിരപ്പേൽ വീട്ടിൽ ജോസിന്റെ ഒരു വയസുള്ള പോത്തിനെയാണ് ആന ആക്രമിച്ചത്.
പോത്തിന്റെ കരച്ചിൽ കേട്ട് വീട്ടുകാർ നോക്കിയപ്പോഴാണ് ആന ആക്രമിക്കുന്നത് കണ്ടത്. വീട്ടുകാർ ബഹളം വച്ചെങ്കിലും ഫലമുണ്ടായില്ല. അര മണിക്കൂറോളം വീട്ടുപരിസരത്ത് തമ്പടിച്ച ആന പിന്നീട് വനത്തിലേക്ക് മടങ്ങി.
കാട്ടാന ശല്യം രൂക്ഷമായ പ്രദേശമാണ് വടാട്ടുപാറ പനഞ്ചോട് പ്രദേശം. വേലിയുടെ അപര്യാപ്തത മൂലം വന്യമൃഗങ്ങളുടെ നിരന്തരമായ ശല്യമാണ് പ്രദേശത്തെന്ന് പ്രദേശവാസികൾ പറഞ്ഞു.
Comments