മെട്രോയിൽ ഇനി ‘പാർട്ടി’ നടത്താം; വെഡ്ഡിങ് ഷൂട്ടുകളും വാർഷിക ആഘോഷങ്ങളും അനുവദിക്കും; നിരക്കുകൾ ഇങ്ങനെ

ലക്‌നൗ: വീടുകളിലും റെസ്‌റ്റോറന്റുകളിലും ഓഡിറ്റോറിങ്ങളിലുമൊക്കെ പാർട്ടി നടത്തി മടുപ്പുതോന്നിയെങ്കിൽ വെറൈറ്റി സ്ഥലം ആഗ്രഹിക്കുന്നവരെ ക്ഷണിച്ചിരിക്കുകയാണ് നോയിഡ മെട്രോ റെയിൽ കോർപ്പറേഷൻ. നോയിഡയിലെ മെട്രോയിൽ ആഘോഷ ചടങ്ങുകൾ നടത്താൻ ആഗ്രഹിക്കുന്നവർക്ക് അവസരമൊരുക്കുമെന്ന് പ്രഖ്യാപിച്ചിരിക്കുകയാണ് അധികൃതർ.

ജന്മദിന ആഘോഷങ്ങൾ, വിവാഹ വാർഷികങ്ങൾ, പ്രീ-വെഡ്ഡിങ്, പോസ്റ്റ്-വെഡ്ഡിങ് ഷൂട്ടിംഗ് തുടങ്ങി ഏത് ചടങ്ങും നടത്താൻ മെട്രോയുടെ കോച്ചുകളും സ്റ്റേഷനുകളും വേദികളായി അനുവദിക്കും. സിനിമകളുടെയും പരസ്യങ്ങളുടെയും ഷൂട്ടിംഗിനായും മെട്രോ കോച്ചുകളും സ്‌റ്റേഷൻ പരിസരവും ബുക്ക് ചെയ്യാവുന്നതാണ്. മെട്രോയിൽ യാത്രക്കാരിലൂടെ ലഭിക്കുന്ന വരുമാനത്തിന് പുറത്ത് മറ്റൊരു വരുമാന മാർഗമെന്ന് കണക്കിലെടുത്താണ് നീക്കം.

മെട്രോ സ്‌റ്റേഷൻ പാർട്ടി വേദികളാകുക എന്ന സംരംഭം 2020 ഫെബ്രുവരിയിൽ ആരംഭിച്ചിരുന്നുവെങ്കിലും കൊറോണ വ്യാപനം മൂലം നടപ്പിലാക്കാൻ കഴിഞ്ഞിരുന്നില്ല. ഇപ്പോൾ വൈറസ് വ്യാപനം കുറഞ്ഞ പശ്ചാത്തലത്തിലാണ് പ്രഖ്യാപനം

നിബന്ധനകൾ:

ഓരോ കോച്ചിലും പരമാവധി 50 പേരെ അനുവദിക്കും.
കോച്ചുകൾ അലങ്കരിക്കാൻ അനുവാദമുണ്ട്.
സ്‌പ്രേ അല്ലെങ്കിൽ മാജിക് മെഴുകുതിരികൾ ഉപയോഗിക്കുന്നത് കർശനമായി നിരോധിച്ചിട്ടുണ്ട്.
മെട്രോ ജീവനക്കാരുടെ മേൽനോട്ടത്തിൽ മെഴുകുതിരികൾ തെളിയിക്കാം.

പരമാവധി നാല് വരെ കോച്ചുകൾ ബുക്ക് ചെയ്യാം.
രാവിലെ 6 മുതൽ രാത്രി 10.45 വരെയുള്ള സമയത്ത് മാത്രമേ റണ്ണിംഗ് കോച്ചുകൾ ലഭ്യമാകൂ.
അർദ്ധരാത്രി പാർട്ടി നടത്തണമെങ്കിൽ രാത്രി 11 മുതൽ പുലർച്ചെ 2 വരെ സ്റ്റാറ്റിക് ട്രെയിനുകൾ ബുക്ക് ചെയ്യാം.

അലങ്കാരങ്ങൾ ഇല്ലാതെ ഓടുന്ന മെട്രോ കോച്ചിന് 8,000 രൂപയാണ് മണിക്കൂറിന് നിരക്ക്. സ്റ്റാറ്റിക് മെട്രോ കോച്ചിന് മണിക്കൂറിൽ 5,000 രൂപയും ഈടാക്കും. ഓടുന്ന ട്രെയിനുകളും സ്റ്റാറ്റിക് ട്രെയിനുകളും അലങ്കരിച്ച് ഉപയോഗിക്കുകയാണെങ്കിൽ 10,000 രൂപയും 7,000 രൂപയുമാണ് നിരക്ക്.