കുഞ്ഞൻ തലയുള്ള വമ്പൻ ആമ; വംശനാശ ഭീഷണി നേരിടുന്ന സോഫ്റ്റ്‌ഷെൽ ടർട്ടിലിനെ രക്ഷപ്പെടുത്തി ഐഎഫ്എസ് സേന

ന്യൂഡൽഹി: കരയിൽ അപൂർവമായി കാണപ്പെടുന്ന കുഞ്ഞൻ തലയുള്ള ഭീമൻ ആമയാണ് സോഫ്റ്റ്‌ഷെൽ ടർട്ടിൽ. ആഴക്കടലിൽ ജീവിക്കുന്ന ഇത്തരം ആമകൾ വംശനാശഭീഷണി നേരിടുന്നവയാണ്. അത്തരമൊരു സോഫ്റ്റ്‌ഷെൽ ടർട്ടിലിനെ രക്ഷപ്പെടുത്തിയിരിക്കുകയാണ് ഇന്ത്യൻ ഫോറസ്റ്റ് സർവീസിലെ ഉദ്യോഗസ്ഥർ. ആമയെ രക്ഷപ്പെടുത്തുന്ന ദൃശ്യങ്ങൾ ഐഎഫ്എസ് ഓഫീസറായ പർവീൻ കസ്വാനാണ് ട്വിറ്ററിലൂടെ പങ്കുവെച്ചിരിക്കുന്നത്.

This massive Narrow Headed Shoftshell turtle was timely rescued. Endangered & a massive female. After treatment released successfully by our team in deep water. pic.twitter.com/VM16EdnV9G

— Parveen Kaswan, IFS (@ParveenKaswan) April 20, 2022

ഇടതു കൈകാലുകൾക്ക് മുറിവേറ്റ നിലയിലാണ് ആമയെ കണ്ടെത്തിയത്. അതിനെ സ്പീഡ് ബോട്ടിൽ കയറ്റി നടുക്കടലിലെത്തിച്ച് വെള്ളത്തിലേക്ക് ഇറക്കിവിടുന്നതും വൈറലായ വീഡിയോ ദൃശ്യങ്ങളിൽ കാണാം. 100 കിലോയിലധികം ഭാരമുള്ള ഈ ആമ കരയിലെത്തിയത് എപ്രകാരമാണെന്ന് വ്യക്തമല്ല. ആമയെ ചികിത്സിച്ചതിന് ശേഷമാണ് കടലിലേക്ക് തിരിച്ചയച്ചത്.

ഇടുങ്ങിയ തലയുള്ള ഈ ആമ കടലിന്റെ അടിത്തട്ടിലാണ് ജീവിക്കുക. മുട്ടയിടുന്ന സമയത്ത് മാത്രമാണ് ഈ വർഗത്തിലെ പെൺ ആമകൾ കരയിലേക്ക് പ്രവേശിക്കാറുള്ളത്.