രാജ്യത്ത് എയ്ഡ്സ് ബാധിതരുടെ എണ്ണം കുറയുന്നു; 10 വർഷത്തിനിടെ രോഗം ബാധിച്ചത് 17 ലക്ഷം പേർക്ക്; കൂടുതൽ രോഗബാധിതർ ആന്ധ്രയിൽ

ന്യൂഡൽഹി: സുരക്ഷിതമല്ലാത്ത ലൈംഗിക ബന്ധത്തിലൂടെ കഴിഞ്ഞ 10 വർഷത്തിനിടെ രാജ്യത്ത് 17 ലക്ഷം പേർക്ക് എച്ച്ഐവി ബാധിച്ചതായി ദേശീയ എയ്ഡ്സ് കൺട്രോൾ ഓർഗനൈസേഷൻ.
കഴിഞ്ഞ 10 വർഷത്തിനുള്ളിൽ എച്ച്‌ഐവി ബാധിച്ചവരുടെ എണ്ണം ഗണ്യമായി കുറഞ്ഞു. 2011-12ൽ 2.4ലക്ഷം ആളുകളിൽ സുരക്ഷിതമല്ലാത്ത ലൈംഗികബന്ധത്തിലൂടെ എച്ച്‌ഐവി പകരുന്നതായി രേഖപ്പെടുത്തിയപ്പോൾ 2020-21ൽ അത് 85,268 ആയി കുറഞ്ഞു.

2011-2021 കാലയളവിൽ ഇന്ത്യയിൽ 17,08,777 പേർക്ക് എച്ച്‌ഐവി ബാധിച്ചതായി ദേശീയ എയ്ഡ്സ് നിയന്ത്രണ സംഘടന മധ്യപ്രദേശ് ആസ്ഥാനമായുള്ള ആക്ടിവിസ്റ്റ് ചന്ദ്ര ശേഖർ ഗൗർ നൽകിയ വിവരാവകാശ ചോദ്യത്തിന് മറുപടി നൽകി.

ആന്ധ്രാപ്രദേശിൽ 3,18,814, മഹാരാഷ്‌ട്ര 2,84,577, കർണാടക 2,12,982, തമിഴ്‌നാട് 1,16,536, ഉത്തർപ്രദേശ് 1,10,911, ഗുജറാത്ത് 87,440 എന്നിങ്ങനെയാണ് കേസുകളുടെ എണ്ണം.

2011-12 മുതൽ 2020-21 വരെ 15,782 പേർക്ക് രക്തത്തിലൂടെയും രക്ത ഉൽപന്നങ്ങളിലൂടെയും എച്ച്‌ഐവി ബാധിച്ചു, 18 മാസത്തെ ആന്റിബോഡി പരിശോധനാ ഡാറ്റ പ്രകാരം 4,423 പേർക്ക് അമ്മയിൽ നിന്ന് കുട്ടിയിലേക്ക് പകർന്നു. എല്ലാ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും, എച്ച്‌ഐവി പകരുന്ന കേസുകളിൽ സ്ഥിരമായ കുറവുണ്ടായതായി രേഖകൾ പറയുന്നു. 2020 ലെ കണക്കനുസരിച്ച് രാജ്യത്ത് 81,430 കുട്ടികളടക്കം 23,18,737 എച്ച്‌ഐവി ബാധിതരുണ്ട്.

കഴിഞ്ഞ ഒരു ദശാബ്ദമായി ഇന്ത്യയിലെ എച്ച്ഐവി സാഹചര്യം സ്ഥിരത കൈവരിക്കുകയാണെന്ന് ഗുരുഗ്രാമിലെ ഫോർട്ടിസ് മെമ്മോറിയൽ റിസർച്ച് ഇൻസ്റ്റിറ്റ്യൂട്ടിലെ ഇന്റേണൽ മെഡിസിൻ ഡയറക്ടർ സതീഷ് കൗൾ പറഞ്ഞു.
കൊറോണയും ലോക്ക്ഡൗൺ നിയന്ത്രണങ്ങളും കാരണം, കഴിഞ്ഞ രണ്ട് വർഷമായി രാജ്യത്ത് എച്ച്ഐവി ബാധ കുറവായിരുന്നു. എന്നാൽ കൊറോണ കടന്നുപോയ സാഹചര്യത്തിൽ എച്ച് ഐ വി ബാധിതരുടെ എണ്ണം ഉയരാൻ സാധ്യതയുണ്ട്. ഒരാൾക്ക് എച്ച്‌ഐവി പോസിറ്റീവ് ആണെങ്കിൽ, അയാൾ എത്രയും വേഗം ആന്റി റിട്രോവൈറൽ തെറാപ്പി (എആർടി) ആരംഭിക്കണമെന്നും അദ്ദേഹം കൂട്ടിച്ചേർത്തു.

എച്ച്‌ഐവി ബാധിച്ച് ഏതാനും ആഴ്ചകൾക്കുള്ളിൽ, പനി, തൊണ്ടവേദന, ക്ഷീണം തുടങ്ങിയ ലക്ഷണങ്ങൾ ഉണ്ടാകും. എയ്ഡ്‌സിലേക്ക് മാറുന്നതുവരെ രോഗം സാധാരണയായി ലക്ഷണമില്ലാത്തതാണ്. ശരീരഭാരം കുറയൽ, പനി അല്ലെങ്കിൽ രാത്രി വിയർപ്പ്, ക്ഷീണം, ആവർത്തിച്ചുള്ള അണുബാധകൾ എന്നിവ എയ്ഡ്‌സിന്റെ ലക്ഷണങ്ങളിൽ ഉൾപ്പെടുന്നു. എച്ച്‌ഐവിക്ക് ഫലപ്രദമായ ചികിത്സയില്ല. ശരിയായ വൈദ്യ പരിചരണത്തിലൂടെ ഇത് കൈകാര്യം ചെയ്യാൻ കഴിയും.