ഇത് കൊടും തണുപ്പിലും തളരാത്ത ആത്മവിശ്വാസം; 15,000 അടി ഉയരത്തിൽ യോഗ അഭ്യസിച്ച് ഹിമവീരൻമാർ; വീഡിയോ വൈറൽ

ഡെറാഡൂൺ : ഉത്തരാഖണ്ഡിലെ ഹിമാലയ മലനിരകളിലെ കൊടും തണുപ്പിലും യോഗ അഭ്യസിച്ച് ഐടിബിപി സേനാംഗങ്ങൾ. അന്താരാഷ്‌ട്ര യോഗ ദിനത്തിന് മുന്നോടിയായാണ് 15,000 അടി ഉയരത്തിൽ ഹിമവീരന്മാർ യോഗ അഭ്യസിച്ചത്. ഇതിന്റെ വീഡിയോ ഐടിബിപിയുടെ ഒദ്യോഗിക പേജിൽ പങ്കുവെച്ചിട്ടുണ്ട്.

ഏറെ നേരമെടുത്ത് സൈനികർ വിവിധ ആസനങ്ങൾ ചെയ്യുന്നത് വീഡിയോയിൽ കാണാം. ഹിമാലയൻ പർവ്വതമേഖലയിൽ ഇന്ത്യ -ചൈന അതിർത്തി സംരക്ഷിക്കുന്ന സൈനികരാണ് ഹീമവീർസ് എന്നറിയപ്പെടുന്ന ഐടിബിപി സേനാംഗങ്ങൾ. ശരീരം മരവിപ്പിക്കുന്ന കൊടും തണുപ്പ് വകവെയ്‌ക്കാതെ ഇവർ നടത്തുന്ന രാജ്യസേവനം നേരത്തെ തന്നെ ശ്രദ്ധ നേടിയിട്ടുണ്ട്.

#Himveers of Indo-Tibetan Border Police (ITBP) in #Yoga sessions at 15,000 feet in snow conditions in Uttarakhand Himalayas under the aegis of forthcoming International Day of Yoga 2022.#YogaAmritMahotsav#AzadiKaAmritMahotsav #internationaldayofyoga2022 #IYD2022 #yogalife pic.twitter.com/ZcKjDH6ZMA

— ITBP (@ITBP_official) April 29, 2022

നേരത്തെ വിശാഖപട്ടണത്തെ ഭീമിലി സീ ബീച്ചിൽ യോഗ അഭ്യസിക്കുന്ന 56 ാമത് ബറ്റാലിയനിലെ ഐടിബിപി ഉദ്യോഗസ്ഥരുടെ ചിത്രങ്ങൾ പങ്കുവെച്ചിരുന്നു. യോഗ അമൃത് മഹോത്സവ് പരിപാടിയുടെ ഭാഗമായാണ് ഇവർ യോഗ അഭ്യസിച്ചത്.

എല്ലാ വർഷവും ജൂൺ 21-ന് അന്താരാഷ്‌ട്ര യോഗ ദിനം ആചരിച്ചുവരുന്നു. 2014 സെപ്തംബർ 27 ന് ഐക്യരാഷ്‌ട്രസഭയുടെ പൊതുസഭയെ അഭിസംബോധന ചെയ്യവെ പ്രധാനമന്ത്രി നരേന്ദ്ര മോദിയാണ് യോഗ ദിനാചരണം സംബന്ധിച്ച ആശയം ആദ്യമായി അവതരിപ്പിച്ചത്.