ആഗോള റിലീസിൽ ആയിരം കോടി നേടി യഷ് നായകാനെത്തിയ കെജിഎഫ് ചാപ്റ്റർ 2. ആയിരം കോടി പിന്നിടുന്ന നാലാമത്തെ ഇന്ത്യൻ ചിത്രമാണ് പ്രശാന്ത് നീൽ സംവിധാനം ചെയ്ത കെജിഎഫ്. ഇതിന് മുൻപ് ദംഗൽ, ബാഹുബലി2, ആർആർആർ എന്നീ ചിത്രങ്ങളാണ് ആയിരം കോടി ക്ലബ്ബിൽ ഇടം നേടിയത്. ഫിലിം ട്രേഡ് അനലിസ്റ്റായ രമേശ് ബാലയാണ് കെജിഎപ് ചാപ്റ്റർ 2 ആയിരം കോടി പിന്നിട്ട വിവരം പങ്കുവെച്ചത്.
നിലവിലെ വിജയ കുതിപ്പ് തുടരുകയാണെങ്കിൽ കെജിഎഫ് 2 ഈ ചിത്രങ്ങളെയെല്ലാം പിന്നിലാക്കുമെന്നാണ് വിലയിരുത്തൽ. ഏപ്രിൽ 14ന് ആഗോള റിലീസായി എത്തിയ ചിത്രം ആദ്യ ദിനം ഇന്ത്യയിൽ നിന്നുമാത്രം 134.50 കോടിയാണ് സ്വന്തമാക്കിയത്. 100 കോടിയായിരുന്നു ചിത്രത്തിന്റെ ബജറ്റ്. ഇന്ത്യയിൽ നിന്ന് മാത്രം 780 കോടിയ്ക്ക് മുകളിൽ നേടിയ ചിത്രം വിദേശ മാർക്കറ്റിൽ നിന്നും 220 കോടിയോളം സ്വന്തമാക്കിയിട്ടുണ്ട്.
ഹിന്ദി പതിപ്പിന് മാത്രം സ്വന്തമാക്കിയത് 400 കോടി രൂപയാണ്. തമിഴ്നാട്ടിലും കേരളത്തിലും എല്ലാം റെക്കോർഡ് നേട്ടമാണ് ചിത്രം സ്വന്തമാക്കിയത്. കേരളത്തിൽ 50 കോടിയ്ക്ക് മുകളിലാണ് ചിത്രം സ്വന്തമാക്കിയത്. കേരളത്തിൽ ആദ്യമായാണ് ഒരു അന്യഭാഷാ ചിത്രം ഇത്രയധികം ഓപ്പണിംഗ് കളക്ഷൻ നേടുന്നത്. പിരീഡ് ഡ്രാമ ഗ്യാങ്സ്റ്റർ വിഭാഗത്തിൽ പെട്ട ചിത്രമായ കെ.ജി.എഫ് 2018 ഡിസംബർ 21നാണ് പുറത്തിറങ്ങിയത്. ആദ്യ ഭാഗം ഇന്ത്യയൊട്ടാകെ ഗംഭീര വിജയം നേടിയിരുന്നു.
