ന്യൂഡൽഹി: ഡൽഹിയിൽ റെക്കോർഡ് ചൂടാണ് കഴിഞ്ഞ ദിവസങ്ങളിൽ രേഖപ്പെടുത്തിയത്. കനത്ത ചൂടിനെ പ്രതിരോധിക്കാൻ അധികാരികൾ മാർഗ്ഗ നിർദ്ദേശങ്ങളും പുറത്തിറക്കിയിട്ടുണ്ട്. ഇപ്പോഴിതാ ഡൽഹിയിലെ കനത്ത ചൂടിനെ പ്രതിരോധിക്കാൻ മഹേന്ദ്രകുമാറെന്ന ഓട്ടോഡ്രൈവർ കണ്ടെത്തിയ വഴി ശ്രദ്ധനേടുകയാണ്. ഓട്ടോ റിക്ഷയുടെ മുകളിൽ ചെടികൾ വളർത്തുകയാണ് അദ്ദേഹം.
വിവിധ തരത്തിലുള്ള പൂക്കൾ വിരിയുന്ന ചെടികളാണ് മഹേന്ദ്രകുമാർ നട്ടു പിടിപ്പിച്ചിരിക്കുന്നത്. ഇപ്പോൾ ചൂടിന് ചെറിയ ശമനമുണ്ടെന്നാണ് മഹേന്ദ്ര പറയുന്നത്. രാജ്യതലസ്ഥാനത്ത് ഇപ്പോൾ കാലാവസ്ഥ 45 ഡിഗ്രി സെൽഷ്യസ് വരെ ഉയരുന്നുണ്ട്. കൊടും ചൂടിലും തന്റെ വാഹനത്തിൽ യാത്ര ചെയ്യുന്നവർക്ക് ആശ്വാസമുണ്ടെന്ന് മഹേന്ദ്ര പറയുന്നു. 20 ഓളം വ്യത്യസ്ത ചെടികളാണ് മഹേന്ദ്ര ഓട്ടോയിൽ നട്ടു വളർത്തിയത്.
മഹേന്ദ്ര കുമാറിന്റെ ഓട്ടോയിൽ കയറാനും അതിനൊപ്പം നിന്ന് സെൽഫിയെടുക്കാനുമൊക്കെ ആളുകൾ തിരക്ക് കൂട്ടുന്നുണ്ട്. സഞ്ചരിക്കുന്ന പൂന്തോട്ടത്തിലിരുന്ന് സന്തോഷത്തോടെയാണ് എല്ലാവരും യാത്ര ചെയ്യുന്നത്. രണ്ട് വർഷം മുൻപുണ്ടായ കനത്ത ചൂടിലാണ് ഇത്തരത്തിലൊരു ആശയം മനസിൽ തോന്നുന്നതെന്ന് മഹേന്ദ്ര പറയുന്നു. പൂന്തോട്ടം കൂടാതെ രണ്ട് കൂളറും ഒരു ഫാനും ഓട്ടോയ്ക്കുള്ളിൽ വെച്ചിട്ടുണ്ട്.
ഓട്ടോയ്ക്ക് മുകളിൽ ചെടികൾ വളർത്തുന്നത് പ്രയാസമുള്ള കാര്യമല്ലെന്നും മഹേന്ദ്ര പറഞ്ഞു. ആദ്യം മുകളിൽ ഒരു പായ വിരിച്ചു. പിന്നീട് ഇതിന് മുകളിൽ ചാക്കിട്ടു. ശേഷം മണ്ണ് പരത്തുകയും വെള്ളം തളിക്കുകയും ചെയ്തു. സുഹൃത്തുക്കളാണ് കുമാറിന് വിത്തുകൾ നൽകിയത്. റോഡരികിൽ നിന്ന് കിട്ടിയ കുറച്ച് പുല്ലും വെച്ച് പിടിപ്പിച്ചു. വളരെ പെട്ടെന്ന് തന്നെ വിത്ത് മുളച്ച് വന്നുവെന്നും മഹേന്ദ്ര വ്യക്തമാക്കി.
Comments