കൊച്ചി: കെ.വി തോമസ് അഭിനവ യൂദാസ് ആണെന്ന് യുഡിഎഫ് കൺവീനർ എം എം ഹസ്സൻ. പാർട്ടി കോൺഗ്രസ് വേദിയിൽ യേശുദേവന്റെ ചിത്രം നൽകി സ്വീകരിച്ച സിപിഎം, തിരഞ്ഞെടുപ്പ് കൺവെൻഷനിൽ യൂദാസിന്റെ ചിത്രം നൽകി സ്വീകരിക്കണമെന്നും ഹസൻ പരിഹസിച്ചു. ‘ കെ.വി തോമസ് ഇടതുപക്ഷത്തിന് വേണ്ടി പ്രചാരണത്തിന് ഇറങ്ങുമെന്നത് പുതുമയില്ല. പാർട്ടി കോൺഗ്രസ് വേദിയിൽ യേശുദേവന്റെ ചിത്രം നൽകിയാണ് കെ.വി.തോമസിനെ സ്വീകരിച്ചത്. നാളെ കൺവെൻഷനിൽ പങ്കെടുക്കുമ്പോൾ യൂദാസിന്റെ ചിത്രം നൽകി വേണം സ്വീകരിക്കാൻ. അഭിനവ യൂദാസ് ആണ് കെ.വി.തോമസ്. കോൺഗ്രസ് പ്രവർത്തകരുടെ ഒരു വോട്ട് പോലും നേടാൻ കെ.വി തോമസിനാവില്ലന്നും’ ഹസ്സൻ തിരുവനന്തപുരത്ത് പറഞ്ഞു.
കെ. വി തോമസിന്റെ നിലപാടിൽ പ്രതികരിക്കാനില്ലെന്നാണ് തൃക്കാക്കരയിലെ യുഡിഎഫ് സ്ഥാനാർത്ഥി ഉമ തോമസ് പറഞ്ഞത്. എല്ലാം നേതൃത്വം പറയും. മാഷിനോട് സ്നേഹം മാത്രം. ഇപ്പോൾ ശ്രദ്ധ വോട്ട് പിടിക്കുന്നതിലാണെന്നും ഉമ തോമസ് പറഞ്ഞു. അതേസമയം കെ.വി.തോമസിനെതിരെ സംസ്ഥാന നേതൃത്വത്തിന് അച്ചടക്ക നടപടി സ്വീകരിക്കാമെന്ന് കോൺഗ്രസ് സംഘടനാ ജനറൽ സെക്രട്ടറി കെ.സി.വേണുഗോപാൽ പറഞ്ഞു. ‘ കോൺഗ്രസുകാരനായിരിക്കും. പക്ഷേ സിപിഎമ്മിന് വേണ്ടി പ്രവർത്തിക്കും എന്ന് പറയുന്നതും ചെയ്യുന്നതും ഒന്നൊന്നര തമാശയാണ്. നടപടി എടുക്കാനുള്ള അധികാരം സംസ്ഥാന ഘടകത്തിനുണ്ട്. നടപടി എടുത്ത ശേഷം എഐസിസിയെ അറിയിച്ചാൽ മതിയെന്നും’ കെ.സി.വേണുഗോപാൽ പറഞ്ഞു.
Comments