ആരാധകർ ഏറെയുള്ള ഇൻസ്റ്റൻറ് വിഭവമാണ് മാഗി നൂഡിൽസ്. വളരെ പെട്ടെന്ന് തയ്യാറാക്കാമെന്നതിനാലും വില കുറവായതിനാലും നിരവധിയാളുകൾ ഇത് ഭക്ഷണമാക്കാറുണ്ട്. ഇതിനിടെയാണ് മാഗി നൂഡിൽസിൽ നടത്തിയ ഒരു വ്യത്യസ്ത പരീക്ഷണം ഇപ്പോൾ ഇന്റർനെറ്റ് കീഴടക്കുന്നത്.
അധികമാരും പരിശ്രമിച്ചുനോക്കാത്ത പാചകരീതികൾ പരീക്ഷിച്ച് സമൂഹമാദ്ധ്യമങ്ങൾ കീഴടക്കുന്നവരെ പോലെ ഒരു യുണീക്ക് റെസിപ്പിയുമായാണ് ഇവിടെ പാചകക്കാരി എത്തിയത്. ഇൻസ്റ്റഗ്രാമിലൂടെ ഗ്രേറ്റ് ഇന്ത്യൻ ഫുഡ്ഡി എന്ന പേജാണ് ഈ വ്യത്യസ്ത വിഭവത്തെ എത്തിച്ച് വൈറലാക്കിയതെങ്കിലും നിരവധി വിമർശനങ്ങളും ഇതിനെചൊല്ലി സംഭവിച്ചുവെന്നതാണ് യാഥാർത്ഥ്യം.
സാധാരണയായി നൂഡിൽസ് ഉണ്ടാക്കുന്നതിന് സമാനമായി മാഗി നൂഡിൽസ് വേവിക്കുകയാണ് പാചകക്കാരി. പിന്നാലെ മസാലയും ചേർത്തു. നൂഡിൽസ് വെന്തുവരുന്നതിനിടെ പാചകക്കാരി മാങ്ങാ ജ്യൂസ് കൂടി അതിൽ ചേർക്കുകയാണ്. സ്ലൈസ് എന്ന മാംഗോ ജ്യൂസിന്റെ കുപ്പി പൊട്ടിച്ചാണ് ഇവർ വേവിക്കുന്ന നൂഡിൽസിലേക്ക് ചേർത്തത്. പ്ലേറ്റിലാക്കി കഴിക്കാൻ തരുന്നതിന് മുമ്പേ ഒരു മാങ്ങയെടുത്ത് ചെത്തി കഷ്ണങ്ങളാക്കി നൂഡിൽസിന് മീതെ വെച്ച് അലങ്കരിക്കുകയും ചെയ്തു.
ലക്ഷക്കണക്കിനാളുകൾ കണ്ട ഈ വീഡിയോക്ക് താഴെ പലവിധത്തിലുള്ള പ്രതികരണങ്ങളാണ് എത്തിയത്. ഇതിൽ ഭൂരിഭാഗമാളും റെസിപ്പി അംഗീകരിക്കാൻ കഴിയില്ലെന്ന അഭിപ്രായം പങ്കുവെച്ചു. വിമർശനത്തിന്റെ ഭാഷയും പലരും അതിരുകടന്നാണ് പ്രയോഗിച്ചത്. അസഭ്യവർഷവും കമന്റുകൾക്കിടയിൽ വേണ്ടുവോളമുണ്ടായി. വിമർശനവും അസഭ്യവർഷവും അധികരിച്ചതോടെ ഗ്രേറ്റ് ഇന്ത്യൻ ഫുഡ്ഡി എന്ന പേജിൽ നിന്നും വീഡിയോ നീക്കം ചെയ്തു.
1800-കളിൽ സ്വിറ്റ്‌സർലാൻഡിൽ നിന്നുണ്ടായ വിഭവമാണ് മാഗി നൂഡിൽസ്. പിന്നീട് 1947-ൽ നെസ്ലേ ഇത് വാങ്ങുകയായിരുന്നു. ഇന്ത്യയെ കൂടാതെ ബംഗ്ലാദേശ്, ദക്ഷിണാഫ്രിക്ക, പാകിസ്താൻ, സിംഗപ്പൂർ, മലേഷ്യ, ഓസ്‌ട്രേലിയ, ന്യൂസിലാൻഡ്, ശ്രീലങ്ക, നേപ്പാൾ, ഭൂട്ടാൻ, മാലിദ്വീപ് എന്നിവിടങ്ങളിലും മാഗി നൂഡിൽസ് ജനപ്രീതി നേടിയിട്ടുണ്ട്.
Comments