പാലക്കാട്; പാലക്കാട് ബിജെപി സംസ്ഥാന ജനറൽ സെക്രട്ടറിയുടെ തറവാട് വീടിന് സമീപം നായയെ വെട്ടിക്കൊന്ന നിലയിൽ കണ്ടെത്തി. സംസ്ഥാന ജനറൽ സെക്രട്ടറി സി. കൃഷ്ണകുമാറിന്റെ തറവാട് വീടിന് സമീപമാണ് സംഭവം.
നഗരസഭയിലെ പതിനഞ്ചാം വാർഡ് ആയ തോറപാളയത്തിലാണ് സംഭവം. തെരുവുനായയെ ആണ് വെട്ടിക്കൊലപ്പെടുത്തിയ രീതിയിൽ കണ്ടെത്തിയത്. റോഡിനോട് ചേർന്ന് മതിലിന് അരികിൽ ഓടയിലാണ് നായയുടെ ജഡം കണ്ടത്. സംഭവത്തിൽ അന്വേഷണം ആവശ്യപ്പെട്ട് വാർഡ് കൗൺസിലർ പോലീസിൽ പരാതി നല്കി.
ജില്ലയിൽ പോപ്പുലർ ഫ്രണ്ട്, എസ്ഡിപിഐ പ്രവർത്തകർ ബിജെപി, സംഘപരിവാർ പ്രവർത്തകരെ തുടർച്ചയായി കൊലക്കത്തിക്ക് ഇരയാക്കുന്നതിന്റെ പശ്ചാത്തലത്തിലാണ് സംഭവത്തിൽ ദുരൂഹത സംശയിക്കുന്നത്. തീവ്രവാദ സംഘടനകൾ ഇത്തരത്തിൽ മൃഗങ്ങളെ വെട്ടിക്കൊന്ന് പരിശീലനം നടത്തുന്ന സംഭവങ്ങൾ മുൻപും സംസ്ഥാനത്ത് ഉണ്ടായിട്ടുണ്ട്. ഇതിന്റെ പശ്ചാത്തലത്തിൽ സംഭവം ഗൗരവമായി അന്വേഷിക്കണമെന്ന ആവശ്യം ഉയർന്നുകഴിഞ്ഞു.
ആർഎസ്എസ് തേനാരി മണ്ഡലം ബൗദ്ധിക് പ്രമുഖ് സഞ്ജിത്, ആർഎസ്എസ് മുൻ പ്രചാരക് ശ്രീനിവാസ് എന്നിവരെ എസ്ഡിപിഐ, പോപ്പുലർ ഫ്രണ്ട് തീവ്രവാദികൾ കൊലപ്പെടുത്തിയത് സമീപകാലത്താണ്. ശ്രീനിവാസൻ കൊലപാതകത്തിന് ശേഷം പോലീസ് കടുത്ത ജാഗ്രത പുലർത്തുകയും കർശന നിരീക്ഷണങ്ങൾ നടത്തുകയും ചെയ്യുന്നുണ്ട്.
ജില്ലയിൽ പോപ്പുലർ ഫ്രണ്ടിന്റെയും എസ്ഡിപിഐയുടെയും നേതൃത്വത്തിൽ ഭീകരസാന്നിദ്ധ്യം വർദ്ധിച്ചുവരുന്നതായും ഭീകര പരിശീലനം ഉൾപ്പെടെയുളള കാര്യങ്ങളിൽ വിശദമായ അന്വേഷണം നടത്തണമെന്നും ആവശ്യമുയരുന്നതിനിടെയാണ് തെരുവുനായയെ വെട്ടിക്കൊന്ന സംഭവം.
