ന്യൂഡൽഹി: അടിസ്ഥാന രഹിതമായ ആരോപണങ്ങൾ നിരത്തി ആഗോളസമൂഹത്തിന് മുൻപിൽ പ്രധാനമന്ത്രി നരേന്ദ്ര മോദിയുടെ പ്രതിച്ഛായ തകർക്കാൻ ശ്രമിക്കുന്ന കോൺഗ്രസ് നേതാവ് രാഹുൽ ഗാന്ധിയ്ക്കെതിരെ ബിജെപി. പ്രധാനമന്ത്രിയ്ക്കെതിരായ രാഹുൽഗാന്ധിയുടെ പെരുമാറ്റം ദോഷകരമായി ഭവിക്കുക രാജ്യത്തിനാണെന്ന് ബിജെപി വക്താവ് ഗൗരവ് ഭാട്ടിയ പറഞ്ഞു. ലണ്ടനിൽ നടന്ന പൊതുപരിപാടിയിൽ രാഹുൽ ഗാന്ധി പ്രധാനമന്ത്രിയ്ക്കെതിരെ ആരോപണങ്ങൾ ഉന്നയിച്ചിരുന്നു. ഇതിന്റെ പശ്ചാത്തലത്തിലാണ് ബിജെപിയുടെ പ്രതികരണം.
പ്രധാനമന്ത്രിയോടുള്ള വെറുപ്പ് പ്രചരിപ്പിച്ച് രാഹുൽ ഗാന്ധി രാജ്യത്തെ അപകടത്തിലാക്കുകയാണ്. 1984 ലെ സിഖ് വിരുദ്ധ കലാപം മുതൽ രാജ്യത്ത് തുടർ കലാപങ്ങൾക്കായി രാഹുൽ ഗാന്ധി ശ്രമിക്കുകയാണ്. പ്രതീക്ഷയില്ലാത്ത കോൺഗ്രസിലെ പാർട്ട് ടൈം നേതാവാണ് രാഹുൽ. മറ്റ് രാജ്യങ്ങളിൽ പോയി സ്വന്തം രാജ്യത്തെ കുറ്റം പറയുന്നത് രാഹുലിന്റെ പതിവാണ്. ചതിയെന്ന് അല്ലാതെ ഇതിനെ വിശേഷിപ്പിക്കാൻ മറ്റ് വാക്ക് ഇല്ലെന്നും അദ്ദേഹം പറഞ്ഞു.
വിദേശ പര്യടനത്തിനായി ലണ്ടനിൽ എത്തിയ രാഹുൽ ഗാന്ധി ഐഡിയാസ് ഫോർ ഇന്ത്യ എന്ന പരിപാടിയിലാണ് രാജ്യത്തെയും, പ്രധാനമന്ത്രിയെയും ഇകഴ്ത്തി സംസാരിച്ചത്. ഇന്ത്യയുടെ ജനാധിപത്യത്തെ പ്രധാനമന്ത്രിയും ബിജെപി സർക്കാരും ചേർന്ന് നശിപ്പിക്കുന്നുവെന്നായിരുന്നു രാഹുൽ ഗാന്ധിയുടെ പ്രധാന ആരോപണം.
