പിണറായി സർക്കാർ ജനങ്ങളെ കൊള്ളയടിക്കുന്നു; സംസ്ഥാനത്തെ പെട്രോൾ- ഡീസൽ വില കുറയ്‌ക്കണമെന്ന് കെ. സുരേന്ദ്രൻ

തിരുവനന്തപുരം: കേന്ദ്രസർക്കാർ നികുതി കുറച്ചതിന് സമാനമായ രീതിയിൽ പെട്രോൾ- ഡീസൽ വില കുറയ്‌ക്കാൻ സംസ്ഥാന സർക്കാരും തയ്യാറാകണമെന്ന് ബിജെപി സംസ്ഥാന അദ്ധ്യക്ഷൻ കെ.സുരേന്ദ്രൻ. ഇന്ധനത്തിന് കൂടുതൽ നികുതി ഈടാക്കി സംസ്ഥാന സർക്കാർ ജനങ്ങളെ കൊള്ളയടിക്കുകയാണ്. വില കുറച്ചില്ലെങ്കിൽ ശക്തമായ പ്രതിഷേധവുമായി ബിജെപി രംഗത്തുവരുമെന്നും സുരേന്ദ്രൻ മുന്നറിയിപ്പ് നൽകി.

കേന്ദ്ര സർക്കാർ പെട്രോളിന് 10 രൂപയും ഡീസലിന് 8 രൂപയും നികുതി കുറച്ചു. ഈ സാഹചര്യത്തിൽ സംസ്ഥാന സർക്കാരും 10 രൂപ വീതം നികുതി കുറയ്‌ക്കാൻ തയ്യാറാവണം. ജനദ്രോഹ നയത്തിൽ നിന്നും സംസ്ഥാനം പിൻമാറിയില്ലെങ്കിൽ ബിജെപി ശക്തമായ പ്രതിഷേധം നടത്തും. മറ്റു സംസ്ഥാനങ്ങൾ എല്ലാം കേരളത്തേക്കാൾ കുറഞ്ഞ നികുതി ഈടാക്കുമ്പോൾ സംസ്ഥാന സർക്കാർ കൊള്ള നടത്തുകയാണ്. കഴിഞ്ഞ തവണ കേന്ദ്രം നികുതി കുറച്ചപ്പോഴും സംസ്ഥാനം നികുതി കുറച്ചിരുന്നില്ല. നികുതി കുറച്ച് ബസ് – ടാക്‌സി ചാർജ് കുറയ്‌ക്കുകയാണ് സർക്കാർ ചെയ്യേണ്ടതെന്നും സുരേന്ദ്രൻ പറഞ്ഞു.

വൈകീട്ടോടെയാണ് പെട്രോൾ ,ഡീസൽ വില കുത്തനെ കുറച്ചുകൊണ്ടുള്ള കേന്ദ്രസർക്കാർ തീരുമാനം പുറത്തുവന്നത്. കേന്ദ്ര നികുതി കുറച്ചതോടെ ഡൽഹി ,ഉത്തർപ്രദേശ് തുടങ്ങി പല സംസ്ഥാനങ്ങളിലും പെട്രോൾ വില നൂറ് രൂപക്ക് താഴെ എത്തും . കഴിഞ്ഞ തവണ കേന്ദ്രം നികുതി ഇളവ് നൽകിയപ്പോൾ അതിനനുസരിച്ച് സംസ്ഥാന നികുതിയിൽ ഇളവ് നൽകാത്ത കേരളത്തിൽ പെട്രോൾ വില 115 നു മുകളിലാണ് ഇപ്പോഴുള്ളത് ,അതുകൊണ്ട് തന്നെ കേന്ദ്ര നികുതി ഇളവ് അനുസരിച്ച് ഒൻപത് രൂപ കുറഞ്ഞാലും കേരളത്തിൽ പെട്രോൾ വില 100 രൂപക്ക് മുകളിൽ തുടരും.