അണക്കെട്ടിൽ വലിഞ്ഞുകയറി സാഹസിക പ്രകടനം; കാൽ വഴുതി 30 അടി താഴ്ചയിലേക്ക് വീണു; ഗുരുതര പരിക്ക്; വീഡിയോ കാണാം

ബംഗളൂരു : അണക്കെട്ടിന്റെ മതിൽക്കെട്ടിലൂടെ വലിഞ്ഞുകയറിയ യുവാവ് താഴെ വീണ് ഗുരുതരമായി പരിക്കേറ്റു. കർണാടകയിലെ ശ്രീനിവാസ അണക്കെട്ടിലാണ് സംഭവം. വെള്ളച്ചാട്ടത്തിനിടയിലൂടെ കയറിയ യുവാവ് മുപ്പത് അടി താഴ്‌ച്ചയിലേക്കാണ് വീണത്. സമീപത്തുണ്ടായിരുന്നവരുടെ മുന്നറിയിപ്പ് അവഗണിച്ചായിരുന്നു യുവാവിന്റെ സാഹസിക പ്രകടനം. സംഭവത്തിൽ യുവാവിനെതിരെ പോലീസ് കേസെടുത്തു.

ചിക്കബെല്ലാപുരിൽ നിന്ന് അണക്കെട്ട് കാണാൻ എത്തിയതായിരുന്നു യുവാവും സംഘവും. എന്നാൽ അണക്കെട്ടിന്റെ മതിൽ കണ്ടതോടെ ഇയാൾ അതിൽ പിടിച്ച് കയറാൻ ആരംഭിച്ചു. കൂടെയുണ്ടായിരുന്നവർ എതിർത്തെങ്കിലും യുവാവ് അതൊന്നും ചെവികൊണ്ടില്ല. അണക്കെട്ടിന്റെ ഭിത്തിയിലും മുന്നറിയിപ്പുകളുണ്ടായിരുന്നു. എന്നാൽ ഇതെല്ലാം അവഗണിച്ച് യുവാവ് മുന്നോട്ട് പോകുകയായിരുന്നു.

A man fell down the wall of Srinivasa Sagara Dam in #Chikkaballapur and got injured while he was attempting to scale the wall. Reports @dpkBopanna pic.twitter.com/KUpU1NRgyR

— Sanjay Jha (@JhaSanjay07) May 23, 2022

യാതൊരു സുരക്ഷാസംവിധാനങ്ങളുമില്ലാതെയാണ് യുവാവ് സാഹസത്തിന് മുതിർന്നത്. 50 അടിയോളമുള്ള അണക്കെട്ടിന്റെ ഭിത്തിയിൽ മുപ്പതടി ഉയരം ഇയാൾ കയറി. അപ്പോഴേക്കും കാൽ വഴുതി താഴേക്ക് വീഴുകയായിരുന്നു. നട്ടെല്ലിനും കാലിനും പരിക്കേറ്റ യുവാവ് ബെംഗളൂരുവിലെ ആശുപത്രിയിൽ ചികിത്സയിലാണ്.