ന്യൂഡൽഹി : ലഡാക്കിൽ അപകടത്തിൽ പെട്ട് സൈനിക ഉദ്യോഗസ്ഥർ മരിച്ചതിൽ ദുഃഖം രേഖപ്പെടുത്തി പ്രധാനമന്ത്രി നരേന്ദ്ര മോദി. ധീരരായ ഏഴ് സൈനിക ഉദ്യോഗസ്ഥരെ രാജ്യത്തിന് നഷ്ടപ്പെട്ടതിൽ വേദനയുണ്ടെന്ന് അദ്ദേഹം പറഞ്ഞു. ട്വിറ്ററിലൂടെയാണ് പ്രധാനമന്ത്രി അനുശോചനം അറിയിച്ചത്.
എന്റെ പ്രാർത്ഥന എന്നും മരിച്ച സൈനികരുടെ കുടുംബത്തോടൊപ്പമാണ്. പരിക്കേറ്റ സൈനികർ എത്രയും വേഗം സുഖം പ്രാപിക്കുമെന്ന് പ്രതീക്ഷിക്കുന്നു. ദുരിതബാധിതർക്ക് സാധ്യമായ എല്ലാ സഹായവും നൽകുമെന്നും അദ്ദേഹം ഉറപ്പ് നൽകി.
Anguished by the bus accident in Ladakh in which we have lost our brave army personnel. My thoughts are with the bereaved families. I hope those injured recover at the earliest. All possible assistance is being given to the affected.
— Narendra Modi (@narendramodi) May 27, 2022
ഇന്ന് രാവിലെ ഒമ്പതോടെയാണ് സൈനികർ സഞ്ചരിച്ച വാഹനം അപകടത്തിൽപ്പെട്ടത്. സംഭവത്തിൽ ഏഴു പേർ മരിക്കുകയും 19 പേർക്ക് പരിക്കേൽക്കുകയും ചെയ്തിരുന്നു. ഇന്ത്യ- ചൈന അതിർത്തിയിലെ തുർതുക് സെക്ടറിലായിരുന്നു അപകടം.
മരിച്ചവരിൽ ഒരു മലയാളി സൈനികനും ഉണ്ട്. പരപ്പനങ്ങാടി സ്വദേശി കെപി എച്ച് റോഡ് നുള്ളക്കുളം സ്വദേശി തച്ചോളി കോയക്കുട്ടിയുടെ മകൻ മുഹമ്മദ് ഷൈജൽ (41) ആണ് മരിച്ചത്.
പർതാപൂരിൽ നിന്ന് ഹനീഫിലേക്ക് പോവുകയായിരുന്ന വാഹനം ഷിയോക് നദിയിലേക്ക് വീഴുകയായിരുന്നു. 26 സൈനികരാണ് വാഹനത്തിലുണ്ടായിരുന്നത്. ഏകദേശം 50-60 അടി താഴ്ചയിലേക്കാണ് വാഹനം പതിച്ചത്.
