ആലപ്പുഴ:ജാമ്യം കിട്ടിയതിന് പിന്നാലെ കോടതി വളപ്പിൽ ഗുണ്ടകൾ കേക്ക് മുറിച്ച് ആഘോഷിച്ചത് വിവാദമായി.ആലപ്പുഴ കോടതി വളപ്പിലാണ് ഗുണ്ടകളുടെ ആഘോഷ പ്രകടനം. കഴിഞ്ഞ ദിവസം ഹൗസ് ബോട്ട് പാർട്ടിക്കിടെ പിടിയിലായ മരട് അനീഷും കൂട്ടാളികളുമാണ് ജാമ്യം കിട്ടിയത് ആഘോഷിച്ചത്.ഇതിന്റെ വീഡിയോ ജനം ടിവി പുറത്തുവിട്ടിരുന്നു.
ലഹരി മരുന്നും മദ്യവുമായി ഗുണ്ട മരട് അനീഷ്, കരൺ , ഡോൺ അരുൺ എന്നിവരടക്കം 17 പേരെയാണ് പിടികൂടിയത്. പുന്നമടയിൽ പുരവഞ്ചിസഞ്ചാരത്തിനായെത്തിയതായിരുന്നു സംഘം.മരട് അനീഷ് വന്ന കാറിൽ നിന്ന് എംഡിഎംഎയും മലേഷ്യൻ കത്തികളും പിടികൂടിയിരുന്നു. ഇന്നലെ വൈകീട്ടാണ് ഇവർക്ക് ജാമ്യം ലഭിച്ചത്.
മരട് അനീഷും മറ്റു രണ്ടുപേരും കാറിലും സംഘാംഗങ്ങളായ 17 പേർ മറ്റു വാഹനങ്ങളിലുമാണെത്തിയത്. സുഹൃത്തിന്റെ ജന്മദിനമാഘോഷിക്കാനാണ് ഇവർ പുരവഞ്ചിയാത്രയ്ക്കിറങ്ങിയത്. ഒപ്പം മയക്കുമരുന്നിടപാടുകൾ കൂടി ലക്ഷ്യമിട്ടിരുന്നതായി പോലീസ് ഇന്നലെ വ്യക്തമാക്കിയിരുന്നു.
