കൊൽക്കത്ത: ഏഷ്യൻ കപ്പ് ഫുട്ബോൾ യോഗ്യതാ റൗണ്ടിൽ അഫ്ഗാനിസ്ഥാനെതിരെ തകർപ്പൻ ജയവുമായി ഇന്ത്യ. 2-1 എന്ന സ്കോറിനാണ് ഇന്ത്യയുടെ വിജയം. മത്സരത്തിന്റെ 86ാം മിനിറ്റിൽ ഫ്രീ കിക്കിലൂടെ സുനിൽ ഛേത്രിയാണ് ഇന്ത്യയുടെ ആദ്യ ഗോൾ നേടിയത്. ഇഞ്ചുറി ടൈമിൽ മലയാളി താരം സഹൽ അബ്ദുൾ സമദ് ഇന്ത്യയുടെ വിജയ ഗോൾ നേടി.
ആദ്യന്തം ആവേശം അലതല്ലിയ മത്സരത്തിൽ മികച്ച പ്രകടനമാണ് അഫ്ഗാൻ താരങ്ങൾ കാഴ്ചവെച്ചത്. എന്നാൽ ഇന്ത്യയുടെ പരിചയ സമ്പത്തിന് മുന്നിൽ അവസാന നിമിഷം അഫ്ഗാനിസ്ഥാൻ കീഴടങ്ങുകയായിരുന്നു. സുനിൽ ഛേത്രി ഗോൾ നേടി നിമിഷങ്ങൾക്കുള്ളിൽ സുബൈർ അമീരിയിലൂടെ അഫ്ഗാനിസ്ഥാൻ ഗോൾ മടക്കി. എന്നാൽ ഇഞ്ചുറി ടൈമിൽ സഹൽ നേടിയ ഗോളിലൂടെ ഇന്ത്യ വിജയത്തിൽ എത്തുകയായിരുന്നു.
ആദ്യ മത്സരത്തിൽ കംബോഡിയയെ 2-0 എന്ന സ്കോറിന് ഇന്ത്യ പരാജയപ്പെടുത്തിയിരുന്നു. ജൂൺ 14ന് ഹോങ്കോംഗുമായാണ് ഇന്ത്യയുടെ അടുത്ത മത്സരം. ഈ മത്സരത്തിൽ വിജയിക്കാനായാൽ ഇന്ത്യക്ക് ഏഷ്യൻ കപ്പ് ഫുട്ബോളിലേക്ക് യോഗ്യത നേടാം.
Comments