ന്യൂഡല്‍ഹി:നാഷണല്‍ ഹെറാള്‍ഡ് കേസില്‍ രാഹുല്‍ ഗാന്ധിയെ ചോദ്യം ചെയ്തതിനെതിരെ കോണ്‍ഗ്രസ് നടത്തുന്ന ‘സത്യാഗ്രഹ’പ്രതിഷേധത്തിനെ വിമര്‍ശിച്ച് ബിജെപി നേതാവ് സംബിത് പത്ര. അഴിമതിയെ കോൺഗ്രസ് പാര്‍ട്ടി ആഘോഷിക്കുകയാണെന്ന് സംബിത് പത്ര വ്യക്തമാക്കി.
നാഷണല്‍ ഹെറാള്‍ഡ് അഴിമതി കേസില്‍ ഇന്ന് രാവിലെയാണ് രാഹുൽഗാന്ധി എന്‍ഫോഴ്‌സ്‌മെന്റ് ഡയറക്ട്രേറ്റിനു മുമ്പില്‍ ഹാജരായത്. എന്നാൽ ഇതിനെതിരെ രാജ്യത്തെ മുഴുവൻ ഇഡി ഓഫിസിലേക്കും പ്രതിഷേധ മാർച്ച് നടത്താൻ കോൺഗ്രസ് തീരുമാനിച്ചിരുന്നു. ഇതിനെതിരെയാണ് സംബിത്പത്ര പരിഹാസവുമായി രംഗത്തെത്തിയത്. ബിജെപി ഈ കേസിലൂടെ രാഷ്‌ട്രീയ മുന്നേറ്റമാണ് ലക്ഷ്യം വെയ്‌ക്കുന്നതെന്ന വിമര്‍ശനവും പത്ര തള്ളി.
രാഹുല്‍ ഗാന്ധി ഇഡിക്ക് മുന്നില്‍ ഹാജരായി സത്യം വെളിപ്പെടുത്തണമെന്നും അനധികൃതമായി അപഹരിച്ച 500 കോടിയെക്കുറിച്ച് പറയണമെന്നും സംബിത് പത്ര ആവശ്യപ്പെട്ടു. സത്യാഗ്രഹം നടത്തുന്നതിന് മുന്‍പ് സത്യം പുറത്തു വരട്ടെ എന്നും അദ്ദേഹം കൂട്ടി ചേര്‍ത്തു. കോൺഗ്രസ് ദേശീയ നേതാക്കൾക്കൊപ്പമാണ് രാഹുല്‍ ഗാന്ധി ഇഡി ഓഫീസിലേക്ക് പോകാനെത്തിയത്.
Comments