ന്യൂഡൽഹി: രണ്ടായിരം കോടിയിലധികം സ്വത്തുവകകൾ ഉള്ള ഒരു കുടുംബത്തെ രക്ഷിക്കാനാണ് കോൺഗ്രസ് പ്രവർത്തകരുടെ പ്രതിഷേധമെന്ന് കേന്ദ്രമന്ത്രി അനുരാഗ് ഠാക്കൂർ. നിങ്ങളെന്താണ് കരുതുന്നത്? അവർക്ക് മാത്രം പ്രത്യേക നിയമമുണ്ടെന്നോ? അഴിമതിക്കേസ് ചുമത്തപ്പെട്ടവരുടെ മൊഴി രേഖപ്പെടുത്തുക എന്നത് അന്വേഷണ ഏജൻസികളുടെ ചുമതലയാണ്. അതവരുടെ അവകാശം കൂടിയാണെന്നും വാർത്താവിതരണ പ്രക്ഷേപണ മന്ത്രി അനുരാഗ് ഠാക്കൂർ പറഞ്ഞു. നാഷണൽ ഹെറാൾഡ് കേസുമായി ബന്ധപ്പെട്ട് കോൺഗ്രസ് നേതാവ് രാഹുൽ ഗാന്ധിയെ ഇഡി ചോദ്യം ചെയ്ത സംഭവത്തെ തുടർന്ന് കോൺഗ്രസ് നടത്തിയ പ്രതിഷേധത്തിൽ പ്രതികരിക്കുകയായിരുന്നു അദ്ദേഹം.
അതേസമയം കോൺഗ്രസിന്റെ പ്രതിഷേധം ‘ഗാന്ധി’മാരുടെ പണം സംരക്ഷിക്കാനാണെന്ന് കേന്ദ്രമന്ത്രി സ്മൃതി ഇറാനി കുറ്റപ്പെടുത്തി. ഡോട്ടെക്‌സ് മെർച്ചെൻഡൈസ് പ്രൈവറ്റ് ലിമിറ്റഡുമായി രാഹുൽ ഗാന്ധിക്ക് എന്താണ് ബന്ധമെന്ന് കോൺഗ്രസ് പ്രവർത്തകർ ചോദിക്കണമെന്നും സ്മൃതി ഇറാനി പറഞ്ഞു. ഹവാല കമ്പനികളിൽ ഒന്നാണ് ഡോട്ടെക്‌സ് മെർച്ചെൻഡൈസ് എന്നത് സത്യമാണോ? സാമ്പത്തിക പരിശോധനാ ഏജൻസികൾ ഈ കമ്പനിയുടെ ഇടപാടുകൾക്ക് ചുവപ്പ് കൊടി കാണിച്ചുവെന്നത് സത്യമാണോ? ഇതെല്ലാം പുറത്തുവരേണ്ട വസ്തുതകളാണ്. ഇപ്പോൾ നടക്കുന്ന കോൺഗ്രസിന്റെ പ്രതിഷേധം ജനാധിപത്യം സംരിക്ഷിക്കുന്നതിന് വേണ്ടിയല്ല. മറിച്ച് ‘ഗാന്ധി’മാരുടെ പണം സുരക്ഷിതമാക്കാനാണെന്നും സ്മൃതി ഇറാനി പ്രതികരിച്ചു.
Comments