മയക്കുമരുന്ന് കേസ്; ശ്രദ്ധ കപൂറിന്റെ സഹോദരനും സുഹൃത്തുക്കൾക്കും ജാമ്യം

ബംഗളൂരു:അറസ്റ്റിലായ ശ്രദ്ധ കപൂറിന്റെ സഹോദരൻ സിദ്ധാന്ത് കപൂറും മറ്റ് നാല് പേരും ജാമ്യത്തിലിറങ്ങി. ഞായറാഴ്ച രാത്രി നഗരത്തിൽ നടന്ന പാർട്ടിയിൽ മയക്കുമരുന്ന് ഉപയോഗിച്ചതിനാണ് ബംഗളൂരു പോലീസ് ഇവരെ അറസ്റ്റ് ചെയ്തത്. സമൻസ് ലഭിക്കുന്ന മുറയ്‌ക്ക് ഇവർ പോലീസിന് മുന്നിൽ ഹാജരാകണം.

രഹസ്യ വിവരത്തിന്റെ അടിസ്ഥാനത്തിൽ എംജി റോഡിലെ ഒരു ഹോട്ടലിൽ പോലീസ് റെയ്ഡ് നടത്തുകയായിരുന്നു.തുടർന്ന് മയക്കുമരുന്ന് കഴിച്ചതായി സംശയിക്കുന്ന 35 പേരുടെ സാമ്പിളുകൾ പോലീസ് പരിശോധനയ്‌ക്ക് അയച്ചു.പോസിറ്റീവായ അഞ്ച് പേരിൽ സിദ്ധാന്ത് കപൂറിന്റെ സാമ്പിളും ഉൾപ്പെട്ടിരുന്നു.

21 പുരുഷന്മാരും 14 സ്ത്രീകളുമാണ് പാർട്ടിയിൽ പങ്കെടുത്തത്. ഇവരെല്ലാം മയക്കുമരുന്ന് കഴിച്ചിട്ടില്ലെന്ന് അവകാശപ്പെട്ടിരുന്നു.സംഭവത്തിൽ അഞ്ചുപേരെ പോലീസ് അറസ്റ്റ് ചെയ്തു. ഡിജെ സിദ്ധാന്ത് കപൂർ, അഖിൽ സോണി, ഹർജോത് സിംഗ്, ഹാനി, ഫ്രീലാൻസ് ഫോട്ടോഗ്രാഫറായ അഖിൽ എന്നിവരെയാണ് അറസ്റ്റ് ചെയതത്.

സംഭവസ്ഥലത്ത് നിന്ന് രണ്ട് പാക്കറ്റ് മയക്കുമരുന്ന് കണ്ടെടുത്തതായി പോലീസും വ്യക്തമാക്കിയിരുന്നു.മൂന്ന് നീല നിറത്തിലുള്ള ഗുളികകൾ ഉൾപ്പെടുന്നു.അതേസമയം സുശാന്ത് സിംഗ് രാജ്പുത്തിന്റെ മരണത്തിന് ശേഷം പുറത്തുവന്ന മയക്കുമരുന്ന് കേസിന്റെ അന്വേഷണത്തിനിടെ ഉദ്യോഗസ്ഥര്‍ ശ്രദ്ധ കപൂറിനെ ചോദ്യം ചെയ്തിരുന്നു.

2020-ൽ പുറത്തിറങ്ങിയ ബൗകാൽ എന്ന വെബ് സീരീസിൽ ചിന്തു ദേധ എന്ന കഥാപാത്രത്തെ സിദ്ധാന്ത് കപൂർ അവതരിപ്പിച്ചിരുന്നു.ഇതിന് പുറമെ നിരവധി ചിത്രങ്ങളിലും അദ്ദേഹം അഭിനയിച്ചിട്ടുണ്ട്.ഭാഗം ഭാഗ്, ചപ് ചുപ് കേ തുടങ്ങിയ ചിത്രങ്ങളിൽ സഹസംവിധായകനായും അദ്ദേഹം പ്രവർത്തിച്ചിട്ടുണ്ട്