യുദ്ധക്കപ്പലുകളെ നയിക്കാൻ വനിതാ അഗ്നിവീരരും; അഗ്നിപഥിലൂടെ ലിംഗസമത്വം ഉറപ്പാക്കാൻ നാവികസേന

ന്യൂഡൽഹി : അഗ്നിപഥ് പദ്ധതിയിലൂടെ വനിതാ അഗ്നിവീരരെയും റിക്രൂട്ട് ചെയ്യാനൊരുങ്ങി നാവിക സേന. റിക്രൂട്ട്‌മെന്റിനുള്ള വിജ്ഞാപനം ഈ മാസം 25 ന് പുറത്തിറക്കും. ആർമി, എയർഫോഴ്സ്, നേവി എന്നീ മൂന്ന് സർവീസുകളിലും വനിതാ ഓഫീസർമാരുണ്ടെങ്കിലും, പേഴ്‌സണൽ ബിലോ ഓഫീസേഴ്‌സ് റാങ്ക് (പിബിഒആർ) എന്ന തസ്തികയിൽ വനിതകൾക്ക് അവസരം ലഭിക്കുന്നത് ഇതാദ്യമാണ്.

നാവിക സേനയുടെ വിവിധ കപ്പലുകളിലായി 30 വനിതാ ഓഫീസർമാർ നിലവിൽ സേവനം നടത്തുന്നുണ്ട്. അഗ്നിപഥ് പദ്ധതിക്ക് കീഴിൽ റിക്രൂട്ട് ചെയ്യുന്ന വനിതകളെ യുദ്ധക്കപ്പലുകളിൽ വിന്യസിക്കുമെന്ന് നാവിക സേന ചീഫ് ഓഫ് പേഴ്‌സണൽ വൈസ് അഡ്മിറൽ ദിനേശ് കെ ത്രിപാഠി അറിയിച്ചു.

അഗ്‌നിപഥ് പദ്ധതിയിലൂടെ റിക്രൂട്ട് ചെയ്യപ്പെടുന്ന വനിതാ നാവികരുടെ കൃത്യമായ എണ്ണം നാവികസേന രൂപപ്പെടുത്തിക്കൊണ്ടിരിക്കുകയാണ്. ഇന്ത്യൻ നാവികസേനയുടെ പ്രധാന പരിശീലന കേന്ദ്രമായ ഒഡീഷയിലെ ഐഎൻഎസ് ചിൽകയിൽ വനിതകളെ റിക്രൂട്ട് ചെയ്യുന്നതിനുള്ള ക്രമീകരണങ്ങൾ നടത്തി വരികയാണെന്ന് ത്രിപാഠി പറഞ്ഞു. ഈ വർഷം നവംബറിൽ അഗ്‌നിവീരരുടെ ആദ്യ ബാച്ചിന്റെ പരിശീലനം ആരംഭിക്കുമെന്നും അദ്ദേഹം കൂട്ടിച്ചേർത്തു.

വനിതാ നാവികർക്കായി പരിശീലനത്തിൽ മാറ്റം വരുത്തും. അഗ്‌നിപഥ് പദ്ധതിയിലൂടെ ഏകദേശം 3,000 നാവികരെ ഉൾപ്പെടുത്താനാണ് തീരുമാനമെന്നും അതിൽ 20 ശതമാനം സ്ത്രീകളാണെന്നും നാവികസേനാ വൃത്തങ്ങൾ അറിയിക്കുന്നുണ്ട്. ഗണ്ണറി, ആന്റി സബ്മറൈൻ, നേർക്കുനേരുള്ള യുദ്ധം ഉൾപ്പെടെ നാവികസേനയ്‌ക്കുള്ളിലെ 29 ട്രേഡുകളിലും വനിതാ നാവികരെ ഉൾപ്പെടുത്തും.

വിമാനവാഹിനിക്കപ്പലായ ഐഎൻഎസ് വിക്രമാദിത്യ ഉൾപ്പെടെയുള്ള കപ്പലുകളിൽ വനിതാ നാവികരെ വിന്യസിച്ചതിൽ നിന്നുള്ള പ്രതികരണമാണ് ഈ പ്രഖ്യാപനത്തിലേക്ക് നയിച്ചതെന്നാണ് ഉന്നത വൃത്തങ്ങൾ അറിയിക്കുന്നത്. മാത്രമല്ല നാവികസേനയിലേക്ക് കമ്മീഷൻ ചെയ്യപ്പെടുന്ന പുതിയ കപ്പലുകളിൽ, സ്ത്രീകൾക്കായി പ്രത്യേക ക്യാബിനുകളും സൗകര്യങ്ങളും ഒരുക്കുന്നുണ്ട്.

അടുത്ത രണ്ട് ദശാബ്ദങ്ങളിൽ നിർണായകമായ യുദ്ധക്കപ്പലുകളുടെ കമാൻഡിംഗ് ഓഫീസർമാരായി വനിതകളെ രാജ്യത്തിന് കാണാൻ കഴിയുമെന്ന് നാവികസേനാ മേധാവി അഡ്മിറൽ ആർ. ഹരികുമാർ കഴിഞ്ഞ വർഷം ഡിസംബറിൽ പറഞ്ഞിരുന്നു .

2020 മാർച്ചിൽ, ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള സുപ്രീം കോടതിയുടെ രണ്ടംഗ ബെഞ്ച്, ഇന്ത്യൻ നാവികസേനയിലെ വനിതാ ഉദ്യോഗസ്ഥർക്ക് സ്ഥിരം കമ്മീഷൻ അനുവദിച്ചുകൊണ്ടുള്ള ഡൽഹി ഹൈക്കോടതിയുടെ 2015ലെ വിധി ശരിവച്ചിരുന്നു. ഇതിന് പിന്നാലെയാണ് വനിതകളുടെ സ്ഥിര നിയമനം നടപ്പിലാക്കുന്നത്.