‘ദാരിദ്ര്യവും കഷ്ടപ്പാടുകളും അനുഭവിച്ച ദശലക്ഷങ്ങൾക്ക് പ്രചോദനം‘: ദ്രൗപദി മുർമുവിന് മികച്ച രാഷ്‌ട്രപതിയാകാൻ കഴിയുമെന്ന് പ്രധാനമന്ത്രി

ന്യൂഡൽഹി: എൻഡിഎയുടെ രാഷ്‌ട്രപതി സ്ഥാനാർത്ഥിയായി പ്രഖ്യാപിക്കപ്പെട്ട ദ്രൗപദി മുർമുവിന് വിജയാശംസകൾ നേർന്ന് പ്രധാനമന്ത്രി നരേന്ദ്ര മോദി. ദാരിദ്ര്യവും കഷ്ടപ്പാടുകളും അനുഭവിച്ച ദശലക്ഷക്കണക്കിന് ജനങ്ങൾക്ക് പ്രചോദനമാണ് ദ്രൗപദി മുർമുവിന്റെ ജീവിതം. ഭരണനിർവ്വഹണ കാര്യങ്ങളിലെ അവരുടെ അനുഭവ സമ്പത്തും സഹാനുഭൂതി നിറഞ്ഞ പെരുമാറ്റവും നമ്മുടെ രാജ്യത്തിന് മുതൽക്കൂട്ടാകുമെന്ന് പ്രധാനമന്ത്രി ട്വീറ്റ് ചെയ്തു.

Millions of people, especially those who have experienced poverty and faced hardships, derive great strength from the life of Smt. Droupadi Murmu Ji. Her understanding of policy matters and compassionate nature will greatly benefit our country.

— Narendra Modi (@narendramodi) June 21, 2022

തന്റെ ജീവിതം സാമൂഹ്യ സേവനത്തിനും പാവപ്പെട്ടവരുടെ ഉന്നമനത്തിനും അടിച്ചമർത്തപ്പെട്ടവരുടെയും പാർശ്വവത്കരിക്കപ്പെട്ടവരുടെയും പുരോഗതിക്കും വേണ്ടി ഉഴിഞ്ഞു വെച്ച വ്യക്തിത്വമാണ് ദ്രൗപദി മുർമുവിന്റേത്. മികച്ച നേതൃപാടവവും ഗവർണർ എന്ന നിലയിൽ വളരെ മികച്ച അനുഭവ പരിജ്ഞാനവുമാണ് അവർക്ക് ഉള്ളത്. നമ്മുടെ രാഷ്‌ട്രത്തിന് മികച്ച ഒരു രാഷ്‌ട്രപതിയാകാൻ ദ്രൗപദി മുർമുവിന് സാധിക്കുമെന്ന് എനിക്ക് ഉറപ്പുണ്ട്. പ്രധാനമന്ത്രി ട്വിറ്ററിൽ കുറിച്ചു.

Smt. Droupadi Murmu Ji has devoted her life to serving society and empowering the poor, downtrodden as well as the marginalised. She has rich administrative experience and had an outstanding gubernatorial tenure. I am confident she will be a great President of our nation.

— Narendra Modi (@narendramodi) June 21, 2022

ബിജെപി ദേശീയ അദ്ധ്യക്ഷൻ ജെ പി നദ്ദയാണ് ദ്രൗപദി മുർമുവിനെ രാഷ്‌ട്രപതി സ്ഥാനാർത്ഥിയായി പ്രഖ്യാപിച്ചത്. ഒഡിഷയിൽ നിന്നുള്ള വനവാസി നേതാവാണ് ദ്രൗപദി മുർമു. രാഷ്‌ട്രപതി സ്ഥാനാർത്ഥിയാകുന്ന ആദ്യ ഗോത്രവർഗ വനിത എന്ന പ്രത്യേകതയും ദ്രൗപദി മുർമുവിന് ഉണ്ട്.