ന്യൂഡൽഹി: പാൻ കാർഡും ആധാർ കാർഡും ബന്ധിപ്പിച്ചില്ലെങ്കിൽ വെളളിയാഴ്ച മുതൽ ഇരട്ടി തുക അടയ്ക്കേണ്ടി വരും. നിലവിലെ നിരക്കിൽ ജൂൺ 30 വരെയായിരുന്നു ആദായനികുതി വകുപ്പ് ഇതിന് സമയം അനുവദിച്ചിരുന്നത്. ഇത് അവസാനിച്ച സാഹചര്യത്തിലാണ് വെളളിയാഴ്ച മുതൽ തുക ഇരട്ടിയാകുക.
1000 രൂപയാകും അടയ്ക്കേണ്ടി വരിക. ആദായ നികുതി വകുപ്പ് 2023 മാർച്ച് വരെ പാൻ കാർഡും ആധാർ കാർഡും ബന്ധിപ്പിക്കാൻ സമയം അനുവദിച്ചിട്ടുണ്ടെങ്കിലും ജൂലൈ ഒന്ന് മുതൽ തുക ഇരട്ടിയാക്കുമെന്ന് നേരത്തെ വ്യക്തമാക്കിയിരുന്നു.
2020 മാർച്ച് 31 ആയിരുന്നു നേരത്തെ പ്രഖ്യാപിച്ചിരുന്ന സമയപരിധി. കൊറോണ വ്യാപനവും ലോക്ക്ഡൗണും കാരണം സമയം നീട്ടിനൽകുകയായിരുന്നു. നിലവിൽ ആധാറും പാൻകാർഡും ബന്ധിപ്പിക്കണം എങ്കിൽ ഉപഭോക്താവിന് 500 രൂപ നൽകണം. ഇതാണ് ഇരട്ടിയാക്കി ഉയർത്തുന്നത്.
ഇവ ലിങ്ക് ചെയ്തില്ലെങ്കിൽ വ്യക്തികളുടെ പാൻകാർഡ് പ്രവർത്തനരഹിതമാകും. പാൻ കാർഡ് ഉപയോഗിക്കാൻ സാധിക്കില്ല. ഇതിന് പുറമെ ബന്ധിപ്പിക്കാത്തവർക്ക് ആദായ നികുതി റിട്ടേൺ ഉൾപ്പെടെ സമർപ്പിക്കാനും സാധിക്കില്ല.
പാൻ-ആധാർ ലിങ്കിംഗ് പൂർത്തിയായോ എന്ന് പരിശോധിക്കുന്നതിനുള്ള നടപടി ക്രമങ്ങൾ
ഔദ്യോഗിക വെബ്സൈറ്റ് ലോഗിൻ ചെയ്യുക ( incometaxindiaefiling.gov.in/aadhaarstatsu )
നിങ്ങളുടെ പാൻ, ആധാർ എന്നിവയുടെ വിശദാംശങ്ങൾ നൽകുക
‘വ്യൂ ലിങ്ക് ആധാർ സ്റ്റാറ്റസ്’ ഓപ്ഷനിൽ ക്ലിക്ക് ചെയ്യുക
വരുന്ന സ്ക്രീനിൽ ലിങ്കിംഗ് പൂർത്തിയായോ എന്ന വിവരങ്ങൾ പരിശോധിക്കാവുന്നതാണ്
പാൻ-ആധാർ ഓൺലൈനായി ബന്ധിപ്പിക്കുന്നതിനുള്ള നടപടികൾ
ഐടി വകുപ്പിന്റെ ഇ-ഫയലിംഗ് പോർട്ടൽ സന്ദർശിക്കുക (www.incometaxindiaefiling.gov.in)
‘ക്വിക്ക് ലിങ്കുകൾ’ വിഭാഗത്തിന് കീഴിൽ, ‘ലിങ്ക് ആധാർ’ ക്ലിക്ക് ചെയ്യുക
പാൻ, ആധാർ നമ്പർ, മറ്റ് ആവശ്യമായ വിശദാംശങ്ങൾ എന്നിവ നൽകുക
നിങ്ങളുടെ ആധാർ കാർഡിൽ ജനന വർഷം സൂചിപ്പിച്ചിട്ടുണ്ടെങ്കിൽ മാത്രം ബോക്സിൽ ഒരു ടിക്ക് ഇടുക, തുടർന്ന് യുഐഡിഎഐ ഉപയോഗിച്ച് നിങ്ങളുടെ ആധാർ വിശദാംശങ്ങൾ ഉറപ്പാക്കാൻ ചെക്ക് ബോക്സിൽ ക്ലിക്കുചെയ്യുക.
നിങ്ങളുടെ സ്ക്രീനിൽ ക്യാപ്ച കോഡ് നൽകുക
‘ലിങ്ക് ആധാർ’ ടാബിൽ ക്ലിക്ക് ചെയ്യുക
Comments