കൊഹിമ : മുഖസൗന്ദര്യത്തിൽ കണ്ണുകൾക്ക് വളരെ പ്രധാന്യം ഉണ്ട്. വടക്കുകിഴക്കൻ സംസ്ഥാനങ്ങളിലെ ആളുകളുടെ മുഖസൗന്ദര്യത്തേപ്പറ്റി പറയുമ്പോൾ അവരുടെ കണ്ണുകൾ പരിഹാസത്തിന് വിഷയം ആകാറുണ്ട്.എന്നാൽ നാഗാലാൻഡിലെ ഒരു മന്ത്രി പ്രസംഗത്തിൽ കണ്ണുകളെ പറ്റി ഹാസ്യരൂപേണ നടത്തിയ പരാമർശം സമൂഹമാദ്ധ്യമങ്ങളിൽ വൈറലായിരിക്കുകയാണ്.
ഉന്നതവിദ്യാഭ്യാസം, ഗോത്രവകുപ്പുകൾ കൈകാര്യം ചെയ്യുന്ന തേമ്ജെൻ ഇംന അലോംഗിന്റെ പരാമർശമാണ് വൈറലായത്. ബിജെപിയുടെ സംസ്ഥാന പ്രസിഡന്റ് കൂടിയാണ് തേമ്ജെൻ ഇംന .’കണ്ണുകൾക്ക് വലിപ്പം കുറവാണെങ്കിലും വടക്കുകിഴക്കൻ ഇന്ത്യക്കാർ സൂക്ഷ്മദൃഷ്ടിയുള്ളവരാണ്. കണ്ണുകൾ ചെറിയതായതിനാൽ വളരെ കുറച്ച് പൊടി മാത്രമേ കണ്ണുകളിലേക്ക് പോവാനിടയുള്ളൂ ‘എന്നാണ് അദ്ദേഹം പറഞ്ഞത്.
കൂടാതെ സമയം നീണ്ടുപോകുന്ന പരിപാടികളിൽ ബോറടിക്കുമ്പോൾ ആരുമറിയാതെ ഉറങ്ങുകയും ചെയ്യാം, കണ്ണുകൾ ചെറുതായതിനാൽ ഉറങ്ങുകയാണെന്ന് ഒറ്റ നോട്ടത്തിൽ ആളുകൾ മനസിലാക്കുകയുമില്ലെന്നും അദ്ദേഹം കൂട്ടിച്ചേർത്തു. പൊതുപരിപാടിയിൽനിന്നുള്ള മന്ത്രിയുടെ പ്രസംഗം വളരെ വേഗത്തിലാണ് വൈറലായി മാറിയത്. അസം മുഖ്യമന്ത്രി ഹിമന്ത ബിശ്വ ശർമയും വീഡിയോ ട്വിറ്ററിൽ പങ്കുവെച്ചിട്ടുണ്ട്.
