തിരുവനന്തപുരം: സംസ്ഥാനത്തെ പ്ലസ് വൺ പ്രവേശന നടപടികൾക്ക് ഇന്ന് തുടക്കം.ഇന്ന് മുതൽ പ്ലസ് വൺ പ്രവേശനത്തിനായി അപേക്ഷകൾ ഓൺലൈനായി സമർപ്പിക്കാവുന്നതാണ്. ജൂലൈ 18 വരെ വിദ്യാർത്ഥികൾക്ക് അപേക്ഷിക്കാം. ഒരു ട്രയൽ അലോട്ട്‌മെന്റും മൂന്ന് മുഖ്യ അലോട്ട്‌മെന്റുകളുമാണ് ഉണ്ടാവുക.
ജൂലൈ 21 ന് ട്രയൽ അലോട്ട്‌മെന്ററും 27 ന് ആദ്യ അലോട്ട്‌മെന്റും പ്രസിദ്ധീകരിക്കും.മുഖ്യ ഘട്ടത്തിലെ മൂന്ന് അലോട്ട്‌മെന്റുകൾക്ക് ശേഷം ആഗസ്ത് 17 ന് പ്ലസ് വൺ ക്ലാസ്സുകൾ ആരംഭിക്കും. മുഖ്യ ഘട്ടം കഴിഞ്ഞാൽ പുതിയ അപേക്ഷകൾ ക്ഷണിച്ച് സപ്ലിമെന്ററി അലോട്ട്മെന്റുകളിലൂടെ ശേഷിക്കുന്ന ഒഴിവുകൾ നികത്തും. സെപ്തംംബർ 30 ഓടുകൂടി പ്രവേശന നടപടികൾ പൂർത്തിയാക്കാനാണ് ഉദ്ദേശിക്കുന്നത്.
പ്രവേശന നടപടികൾക്ക് മുന്നോടിയായി സംസ്ഥാനത്തെ പ്ലസ് വൺ സീറ്റുകളിൽ വർദ്ധനവ് വരുത്തിയിട്ടുണ്ട്. 56,935 പ്ലസ് വൺ സീറ്റ് അധികമായി അനുവദിച്ച് പ്രവേശന ഷെഡ്യൂളിൽ ഉൾപ്പെടുത്തി.തിരുവനന്തപുരം, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ, കാസർകോട് ജില്ലകളിലെ ഗവ. ഹയർ സെക്കൻഡറികളിൽ 30 ശതമാനം സീറ്റും എയ്ഡഡ് ഹയർ സെക്കൻഡറികളിൽ 20 ശതമാനം സീറ്റുമാണ് വർദ്ധിപ്പിച്ചത്. കൊല്ലം, എറണാകുളം, തൃശൂർ ജില്ലകളിലെ സർക്കാർ, എയ്ഡഡ് ഹയർ സെക്കൻഡറികളിൽ 20 ശതമാനം സീറ്റും വർധിപ്പിച്ചു.
അപേക്ഷ എങ്ങനെ
www.admission.dge.kerala.gov.in എന്ന വെബ്സൈറ്റിലെ Click for Higher Secondary Admission എന്ന ലിങ്ക് ഉപയോഗിച്ച് ഹയർ സെക്കൻഡറി സൈറ്റിലെത്തുക. തുടർന്ന്, പ്രോസ്‌പെക്ടസ്, 11 അനുബന്ധങ്ങൾ, അപേക്ഷയ്‌ക്കുള്ള യൂസർ മാനുവൽ എന്നിവ ഡൗൺലോഡ് ചെയ്ത്, വ്യവസ്ഥകൾ കൃത്യമായി പരിശോധിക്കുക.
ഓൺലൈനായി മാത്രമാണ് അപേക്ഷാ സമർപ്പണം. ഹയർ സെക്കൻഡറി സൈറ്റിലെ CREATE CANDIDATE LOGIN-SWS ലിങ്കിലൂടെ ലോഗിൻ ചെയ്യുക. മൊബൈൽ ഒടിപി ഉപയോഗിച്ച് പാസ്വേഡ് നൽകി വേണം അപേക്ഷ സമർപ്പിക്കാൻ. ഓപ്ഷൻ സമർപ്പണം, ഫീസടയ്‌ക്കൽ തുടങ്ങിയ പ്രവർത്തനങ്ങളെല്ലാം ഇതേ ലോഗിൻ വഴി തന്നെയാണ്. യൂസർ മാനുവലിലും പ്രോസ്‌പെക്ടസിന്റെ അഞ്ചാം അനുബന്ധത്തിലും അപേക്ഷിക്കാനുള്ള കൃത്യമായ നിർദേശങ്ങളുണ്ട്
