പാവപ്പെട്ടവരെ സഹായിക്കുന്നതിന് വേണ്ടി തന്റെ സമ്പത്ത് മുഴുവൻ ഉത്തർപ്രദേശ് സർക്കാരിന് കൈമാറി ഒരു ഡോക്ടർ. മൊറാദാബാദിൽ നിന്നുള്ള ഡോക്ടർ അരവിന്ദ് കുമാർ ഗോയലാണ് 600 കോടിയോളം വരുന്ന സ്വത്ത് യുപി സർക്കാരിന് കൈമാറിയത്. 50 വർഷത്തോളമായി ഡോക്ടറായി സേവനം അനുഷ്ഠിച്ച് വരുന്ന വ്യക്തിയാണ് അരവിന്ദ് ഗോയൽ. സാമൂഹികസേവന രംഗത്ത് വർഷങ്ങളായി സജീവമാണ് ഇദ്ദേഹം.
നേരത്തെ ലോക്ഡൗൺ സമയത്ത് മൊറാദാബാദിലെ 50 ഗ്രാമങ്ങൾ ദത്തെടുത്ത അരവിന്ദ് ഗോയൽ അവിടുത്തെ ജനങ്ങൾക്ക് ആവശ്യമായ എല്ലാ വസ്തുക്കളും സൗജന്യമായി എത്തിച്ചു കൊടുക്കുകയും അവശ്യ സൗകര്യങ്ങൾ ഒരുക്കുകയും ചെയ്തിരുന്നു. സംസ്ഥാനത്തുള്ള പാവപ്പെട്ട വിദ്യാർത്ഥികൾക്ക് സൗജന്യ വിദ്യാഭ്യാസവും മെച്ചപ്പെട്ട ചികിത്സയും അദ്ദേഹത്തിന്റെ നേതൃത്തിൽ നൽകി വരുന്നുണ്ട്.
സമൂഹത്തിന് വേണ്ടിയുള്ള അദ്ദേഹത്തിന്റെ സേവനങ്ങൾ കണക്കിലെടുത്ത് നിലവിലെ രാഷ്‌ട്രപതി രാം നാഥ് കോവിന്ദ് ഉൾപ്പെടെ നാല് രാഷ്‌ട്രപതിമാർ അരവിന്ദ് ഗോയലിനെ ആദരിച്ചിട്ടുണ്ട്. മുൻ രാഷ്‌ട്രപതിമാരായ ഡോ.എ.പി.ജെ.അബ്ദുൾ കലാം, പ്രതിഭ പാട്ടീൽ, പ്രണബ് മുഖർജി എന്നിവരാണ് അരവിന്ദ് ഗോയലിനെ ആദരിച്ച മറ്റ് രാഷ്‌ട്രപതിമാർ.
Comments