ന്യൂഡല്‍ഹി: അവശ്യ മരുന്നുകളുടെ വിലകുറയ്‌ക്കാന്‍ നീക്കവുമായി കേന്ദ്ര സര്‍ക്കാര്‍. അര്‍ബുദം ഹൃദ്രോഗം തുടങ്ങിയവയ്‌ക്കുള്ള മരുന്നുകള്‍ക്കാകും ഇളവ് കൊണ്ടുവരുക. മരുന്നു കമ്പനികളുമായി ഈ മാസം അവസാനം നടത്തുന്ന ചര്‍ച്ചകള്‍ക്ക് ശേഷമാകും അന്തിമ തീരുമാനം. അവശ്യമരുന്നുകളുടെ 2015-ലെ പട്ടിക പരിഷ്‌കരിക്കാനും ആരോഗ്യ മന്ത്രാലയം തീരുമാനമെടുത്തിട്ടുണ്ട്.
മരുന്നു കമ്പനികളുമായി നടത്തുന്ന ചര്‍ച്ചയില്‍ വില കുറയ്‌ക്കാനുള്ള ഒന്നിലധികം നിര്‍ദ്ദേശങ്ങള്‍ സര്‍ക്കാര്‍ മുന്നോട്ടുവെയ്‌ക്കും. ജീവിതശൈലി രോഗങ്ങള്‍ക്കും അര്‍ബുദ രോഗത്തിനുമുള്ള ഭൂരിഭാഗം മരുന്നുകള്‍ക്കും നിലവില്‍ 12 ശതമാനം ജിഎസ്ടിയാണ് ഈടാക്കുന്നത്. ഇതിലും മാറ്റമുണ്ടാകും. പ്രധാനമന്ത്രിയുടെ സ്വാതന്ത്ര്യദിന ചടങ്ങില്‍ ഇതുസംബന്ധിച്ച നിര്‍ണായക തീരുമാനം ഉണ്ടാകുമെന്നാണ് ലഭിക്കുന്ന വിവരം. എന്നാല്‍ ഇതു സംബന്ധിച്ച് ഔദ്യോഗിക സ്ഥിരീകരണം സര്‍ക്കാരിന്റെ ഭാഗത്ത് ഇതുവരെ ഉണ്ടായിട്ടില്ല.
വില നിയന്ത്രണ പട്ടികയിള്‍ ഉള്‍പ്പെട്ട അവശ്യമരുന്നുകളുടെ വില കഴിഞ്ഞ ഏപ്രില്‍ മാസത്തില്‍ ഉയര്‍ന്നിരുന്നു. ഇതാണ് കേന്ദ്ര സര്‍ക്കാരിനെ മരുന്നുവില കുറയ്‌ക്കാനുള്ള നടപടികളിലേയ്‌ക്ക് നയിച്ചത്. വിലക്കുറവ് നിലവില്‍വരുന്നതോടെ രാജ്യത്തെ ലക്ഷക്കണക്കിനുവരുന്ന രോഗികള്‍ക്ക് ആശ്വാസമാകും.
Comments