ന്യൂഡൽഹി : ഇന്ത്യൻ സൈന്യത്തിനായി രാജ്യത്ത് പ്രത്യേകം തയ്യാറാക്കിയ വാഹനങ്ങൾ വിതരണം ചെയ്ത് ടാറ്റ അഡ്വാൻസ്ഡ് സിസ്റ്റംസ്. ക്വിക്ക് റിയാക്ഷൻ ഫൈറ്റിംഗ് വെഹിക്കിളുകളാണ് ഇന്ത്യൻ സൈന്യത്തിന് വിതരണം ചെയ്തത്. ഇന്ത്യൻ സേനയുടെ പ്രവർത്തന ശേഷി വർദ്ധിപ്പിക്കുക എന്ന ലക്ഷ്യത്തോടെയാണ് സൈനിക വാഹനങ്ങൾ വിന്യസിച്ചത് എന്ന് ടാറ്റ അഡ്വാൻസ്ഡ് സിസ്റ്റംസ് ലിമിറ്റഡ് അറിയിച്ചു.
പ്രതിരോധ ഉപകരണങ്ങളുടെ രൂപകല്പന, വികസനം, നിർമ്മാണം എന്നിവ പ്രോത്സാഹിപ്പിക്കുന്നതിനും അതുവഴി തദ്ദേശീയ പ്രതിരോധ ഉപകരണങ്ങളുടെ ഉൽപ്പാദനം വിപുലീകരിക്കുന്നതിനുമായി കേന്ദ്ര സർക്കാർ നിരന്തരം പരിശ്രമങ്ങൾ നടത്തുകയാണെന്ന് പ്രതിരോധ സഹമന്ത്രി അജയ് ഭട്ട് നേരത്തെ പറഞ്ഞിരുന്നു. തദ്ദേശീയ പ്രതിരോധ ഉപകരണങ്ങളുടെ ഉൽപ്പാദനം പ്രോത്സാഹിപ്പിക്കുന്നതിനായി കേന്ദ്രം സ്വീകരിച്ച നിലപാടുകളുടെ ഫലമായി, വിദേശത്ത് നിന്ന് പ്രതിരോധ സാമഗ്രികൾ എത്തിക്കുന്നതിന്റെ ചെലവ് 46 ശതമാനത്തിൽ നിന്ന് 36 ശതമാനമായി കുറഞ്ഞുവെന്ന് രാജ്യസഭയിൽ രേഖാമൂലമുള്ള മറുപടിയിൽ സഹമന്ത്രി പറഞ്ഞു. കഴിഞ്ഞ നാല് വർഷത്തിനിടെയാണ് ഈ മാറ്റം നടന്നത്.
ക്യുആർഎഫ്വി, ഇൻഫൻട്രി പ്രൊട്ടക്റ്റഡ് മൊബിലിറ്റി വെഹിക്കിൾ (ഐപിഎംവി), ടിഎഎസ്എൽ വികസിപ്പിച്ച അൾട്രാ ലോംഗ് റേഞ്ച് ഒബ്സർവേഷൻ സിസ്റ്റം, ഭാരത് ഫോർജ് വികസിപ്പിച്ച മോണോകോക്ക് ഹൾ മൾട്ടി-റോൾ മൈൻ-പ്രൊട്ടക്റ്റഡ് ആർമേർഡ് വെഹിക്കിൾ എന്നിവ കരസേന മേധാവി ജനറൽ എംഎം നരവാനെ സേനയിൽ ഉൾപ്പെടുത്തിയിരുന്നു.
