ബംഗലൂരു: കോൺഗ്രസ് അഴിമതിയുടെ ഉറവിടമെന്ന് കർണാടക മുഖ്യമന്ത്രി ബസവരാജ് ബൊമ്മൈ. മുഖ്യമന്ത്രി എന്ന നിലയിൽ ഒരു വർഷം പൂർത്തിയാക്കുന്ന തനിക്ക് അവരുടെ സർട്ടിഫിക്കറ്റ് ആവശ്യമില്ലെന്നും അദ്ദേഹം പറഞ്ഞു. കർണാടക സർക്കാരിന് പൂജ്യം മാർക്ക് നൽകുകയും, ബിജെപി ദേശീയ അദ്ധ്യക്ഷൻ ജെ പി നദ്ദ പങ്കെടുക്കുന്ന സർക്കാരിന്റെ വാർഷിക പരിപാടിയെ അപഹസിക്കുകയും ചെയ്ത കോൺഗ്രസിന്റെ നടപടിയോട് പ്രതികരിക്കുകയായിരുന്നു അദ്ദേഹം.
കോൺഗ്രസ് അഴിമതിയുടെ ഉറവിടമാണ്. അവരുടെ മുൻ ദേശീയ അദ്ധ്യക്ഷനും നിലവിലെ ദേശീയ അദ്ധ്യക്ഷയും അഴിമതിക്കേസിൽ ദിവസേന ചോദ്യം ചെയ്യലിന് വിധേയരാക്കപ്പെടുകയാണ്. അവരിൽ നിന്നും ഞങ്ങൾക്ക് ഒന്നും പഠിക്കാനില്ല. ഇതെല്ലാം ജനങ്ങൾക്ക് ബോദ്ധ്യമുള്ള കാര്യങ്ങളാണ്. ബൊമ്മൈ പറഞ്ഞു.
കർണാടക സർക്കാരിന്റെ ഒരു അഴിമതിയെങ്കിലും ചൂണ്ടിക്കാണിക്കാൻ താൻ വെല്ലുവിളിക്കുകയാണ്. ഏതെങ്കിലും ഒരു അഴിമതി ആരോപണമെങ്കിലും സാദ്ധ്യമെങ്കിൽ അവർ തെളിയിക്കട്ടെ. അഴിമതിയിൽ ആറാടുന്ന കോൺഗ്രസിന്റെ കൂടുതൽ വിശേഷങ്ങൾ വരും ദിവസങ്ങളിൽ വെളിപ്പെടുമെന്നും കർണാടക മുഖ്യമന്ത്രി ബസവരാജ് ബൊമ്മൈ വ്യക്തമാക്കി.
Comments