ഗോകുലിനെയും ഏട്ടനെയും ഒരുമിച്ച് കണ്ടപ്പോൾ കണ്ണ് നിറഞ്ഞുപോയി; പാപ്പൻ കണ്ട രാധികയുടെ പ്രതികരണം

സുരേഷ് ഗോപിയും മകൻ ഗോകുൽ സുരേഷും ഒന്നിക്കുന്ന മലയാളികൾ ഏറെ നാളായി കാത്തിരിക്കുന്ന ആക്ഷൻ ചിത്രം പാപ്പൻ തിയേറ്ററുകളിൽ എത്തിയിരിക്കുകയാണ്. ഇന്ന് തിയേറ്ററിൽ റിലീസ് ചെയ്ത ചിത്രത്തിന് മികച്ച പ്രതികരണങ്ങളാണ് ലഭിക്കുന്നത്. വർഷങ്ങൾക്ക് ശേഷമാണ് സംവിധായകൻ ജോഷിയും സുരേഷ് ഗോപിയും ചേർന്ന് സിനിമ ചെയ്യുന്നത് എന്ന പ്രത്യേകത കൂടി ഇതിനുണ്ട്. സുരേഷ് ഗോപി ഗംഭീര തിരച്ചുവരവ് തന്നെയാണ് നടത്തിയിരിക്കുന്നത് എന്ന് ആരാധകർ ഒന്നടങ്കം പറയുന്നു.

സിനിമ കാണാൻ ആദ്യം ദിവസം തന്നെ സുരേഷ് ഗോപിക്കും മകനുമൊപ്പം രാധികയും തിയേറ്ററിൽ എത്തിയിരുന്നു. അച്ഛനെയും മകനെയും ഒരേ സ്‌ക്രീനിൽ കണ്ടപ്പോൾ കണ്ണ് നിറഞ്ഞ് പോയി എന്നാണ് രാധിക പറയുന്നത്.

”ഗോകുലിനെയും ഏട്ടനെയും ഒരുമിച്ച് സ്ക്രീനിൽ കണ്ടതിൽ ഒത്തിരി സന്തോഷം. ഈശ്വരനോട് ഒത്തിരി നന്ദി. വളരെയധികം സന്തോഷവും അതോടൊപ്പം എക്‌സൈറ്റഡുമാണ്. വ്യത്യസ്തമായ രീതിയിലാണ് സിനിമയിൽ കഥാപാത്രങ്ങൾ എത്തിയിരിക്കുന്നത്. ഇരുവരെയും ഓൺ സ്‌ക്രീനിൽ കണ്ടപ്പോൾ കണ്ണുനിറഞ്ഞു. ഇനിയും ഒരുമിച്ച് സ്‌ക്രീനിൽ കാണാൻ ആഗ്രഹമുണ്ട്. ഒരു നല്ല സിനിമ കണ്ട അനുഭവമാണ് ഇപ്പോഴുള്ളത്. എല്ലാവരും തിയറ്ററിൽ തന്നെ സിനിമ കാണണം എന്നും രാധിക പറഞ്ഞു.

വലിയ സിനിമയാണെന്നും എന്നാൽ ബോറഡിക്കാതെയിരുന്ന് കാണാനാകുമെന്നും ഗോകുൽ സുരേഷ് പറഞ്ഞു. അച്ഛന്റെ കൂടെയും ജോഷി സാറിന്റെ കൂടെയും പ്രവർത്തിച്ചതിൽ സന്തോഷമുണ്ടെന്നും നടൻ പ്രതികരിച്ചു.

ഒരിടവേളക്ക് ശേഷം സുരേഷ് ഗോപി പോലീസ് വേഷത്തിൽ എത്തിയ ചിത്രം എന്ന പ്രത്യേകതയും പാപ്പനുണ്ട്. നീതാ പിള്ളയാണ് നായിക. നൈല ഉഷ കനിഹ, ആശാ ശരത്, ജുവൽ മേരി, ഷമ്മി തിലകൻ, വിജയരാഘവൻ, ടിനി ടോം, രാഹുൽ മാധവ്, ശ്രീജിത്ത് രവി ജനാർദ്ദനൻ, നന്ദലാൽ ചന്തു നാഥ്, അച്ചുതൻ നായർ , സാവിത്രി ശ്രീധർ എന്നിവരും പ്രധാന വേഷങ്ങളെ അവതരിപ്പിക്കുന്നു.