വേഷം കെട്ടി കാത്തിരുന്നത് 4 മണിക്കൂർ; മന്ത്രിയെത്തിയില്ല,നിരാശയോടെ കുരുന്നുകൾ

കൊച്ചി: ഉദ്ഘാടകനായ മന്ത്രി എത്താത്തതിനെ തുടർന്ന് നിരാശരായി വിദ്യാർത്ഥികൾ. കൂത്താട്ടുകളും ഗവ യുപി സ്‌കൂളിലാണ് സംഭവം. മാതൃകാ പ്രീപ്രൈമറി സമർപ്പണ ചടങ്ങ് കൊഴുപ്പിക്കാനായി വേഷം കെട്ടി നിന്ന കുട്ടികളാണ് നിരാശരായത്.

4 മണിക്കൂർ കേരളീയ ശൈലിയിൽ സാരിയുടുത്തും മൃഗങ്ങളെ വേഷം കെട്ടിയും നിന്നെങ്കിലും മന്ത്രി എത്തിയില്ല. രാവിലെ 11 നായിരുന്നു പരിപാടിയുടെ ഉദ്ഘാടനം നിശ്ചയിച്ചിരുന്നത്.

എന്നാൽ 2:30 ആയിട്ടും മന്ത്രി എത്താതെ വന്നതോടെ 4 മണിക്കൂർ വേഷം കെട്ടി മുഷിഞ്ഞ കുരുന്നുകളെ മന്ത്രിയെത്തില്ലെന്ന് അറിഞ്ഞതോടെ തിരികെ ക്ലാസ് മുറികളിലേക്ക് കൊണ്ടുപോവുകയായിരുന്നു.

തുടർന്ന് നഗരസഭാ പ്രതിനിധികൾ കൗൺസിൽ യോഗത്തിനും പോയി. ഉച്ച കഴിഞ്ഞ് മന്ത്രിയെ കാത്ത് വീണ്ടും എല്ലാവരും തയ്യാറായെങ്കിലും മന്ത്രിയെത്തിയില്ല. യോഗത്തിന് പോയ നഗരസഭാ പ്രതിനിധികളും തിരിച്ചെത്തിയതോടെ കുട്ടികൾ ഡിസ്‌പ്ലേ അവതരിപ്പിച്ചു. പിന്നാലെഎംഎൽഎ അനൂപ് ജേക്കബ് ഉദ്ഘാടകനാവുകയായിരുന്നു.

മന്ത്രി വൈകിയതോടെ കുട്ടികൾക്കുള്ള ഭക്ഷണം കൊടുക്കാനുള്ള സൗകര്യം കണക്കിലെടുത്താണ് പരിപാടിയുടെ സമയം ഉച്ചയ്‌ക്ക് ശേഷമാക്കിയതെന്ന് ഹെഡ്മാസ്റ്റർ പ്രതികരിച്ചു..

അതേസമയം അപ്രതീക്ഷിതമായി കോട്ടയം ജില്ലയിൽ പരിപാടികൾ വന്നതിനാൽ കൂത്താട്ടുകുളത്ത് എത്താൻ കഴിയില്ലെന്നും മറ്റൊരു ദിവസം എത്താമെന്നും സ്‌കൂൾ അധികൃതരെ അറിയിച്ചതായി മന്ത്രി വിശദീകരിച്ചു.