ബിർമിംഗ്ഹാം: കോമൺവെൽത്ത് ഗെയിംസ് വനിതാ ജൂഡോയിൽ ഇന്ത്യയുടെ സുശീലാ ദേവി ഫൈനലിൽ കടന്നു. മൗറീഷ്യസ് താരത്തെയാണ് സെമിയിൽ സുശീല ദേവി തോൽപ്പിച്ചത്. ഇതോടെ ഗെയിംസിൽ ഇന്ത്യ എട്ടാമത്തെ മെഡൽ ഉറപ്പിച്ചു.
2014 കോമൺവെൽത്ത് ഗെയിംസിൽ ഇന്ത്യക്ക് വേണ്ടി വെള്ളി മെഡൽ നേടിയ താരമാണ് സുശീല ദേവി. 48 കിലോ വിഭാഗത്തിലാണ് സുശീല ദേവി ഫൈനലിൽ കടന്നിരിക്കുന്നത്. മൗറീഷ്യസിന്റെ പ്രിസില്ലയാണ് സെമിയിൽ ഇന്ത്യൻ താരത്തോട് പരാജയപ്പെട്ടത്.
ടോക്യോ ഒളിമ്പിക്സിൽ ഒന്നാം റൗണ്ടിൽ പുറത്തായതിന്റെ ക്ഷീണം തീർക്കുന്ന പ്രകടനമാണ് ബിർമിംഗ്ഹാമിൽ സുശീല ദേവി പുറത്തെടുത്തത്. കോമൺവെൽത്ത് ഗെയിംസിൽ ഇന്നും ഇന്ത്യക്ക് സ്വർണ മെഡൽ നേട്ടം സ്വന്തമാക്കാനായിട്ടുണ്ട്. ഭാരോദ്വഹനം 73 കിലോ വിഭാഗത്തിൽ അചിന്ത ഷീലിയാണ് ഇന്ന് ഇന്ത്യക്ക് വേണ്ടി സ്വർണം നേടിയത്. ഈ ഗെയിംസിലെ ഇന്ത്യയുടെ ആറാം മെഡലാണ് അചിന്ത ഷീലി സ്വന്തമാക്കിയത്. രാജ്യത്തിന്റെ മൂന്നാം സ്വർണ മെഡൽ നേട്ടമാണ് ഇത്.
