ക്രാഷ് ടെസ്റ്റിൽ 5 സ്റ്റാർ നേടിയ കരുത്തൻ; മഹീന്ദ്ര എക്സ്‌യുവി 700 പപ്പടം പോലെ തകർന്നു ; ക്രാഷ് ടെസറ്റ് റേറ്റിംഗ് വെറുതെയോ ? സാമൂഹ്യമാദ്ധ്യമങ്ങളിൽ വാഗ്വാദം- Mahindra xuv 700, Accident

ക്രാഷ് ടെസ്റ്റിൽ 5 സ്റ്റാർ സ്വന്തമാക്കിയതും സുരക്ഷയുടെ കാര്യത്തിൽ മഹീന്ദ്രയുടെ വാഹനങ്ങളിൽ മികച്ചതുമാണ് എസ്‍യുവി 700. എന്നാൽ തമിഴ്നാട്ടിലെ തീരുപ്പൂരിൽ കഴിഞ്ഞ ദിവസം നടന്ന ഒരു അപകടം വാഹനത്തിന്റെ സുരക്ഷയുമായി ബന്ധപ്പെട്ട ചർച്ചക്കൾക്ക് വഴി വെച്ചിരിക്കുകയാണ്. വാഹനത്തിന് ലഭിച്ച 5 സ്റ്റാറിനെപ്പറ്റി സമൂഹമാദ്ധ്യമങ്ങളിൽ ചേരി തിരിഞ്ഞ് തർക്കം നടക്കുന്നു. തിരുപ്പൂർ ജില്ലയിലെ കൊടുവായിന് സമീപമാണ് അപകടം നടന്നത്. അമിത വേ​ഗതയിൽ വന്ന എസ്‍യുവി 700 സ്വകാര്യ ബസുമായി കൂട്ടിയിടിക്കുകയായിരുന്നു. കാറിലുണ്ടായിരുന്ന ആറു പേരിൽ അഞ്ച് പേരും മരണപ്പെട്ടു. ഒരാളുടെ നില അതീവ ​ഗുരുതരമായി തുടരുകയാണ്.

അമിത വേ​ഗത്തിൽ വന്ന എസ്‍യുവിയുടെ ഇടിയുടെ ആഘാതത്തിൽ ബസ് റോഡിനോട് ചേർന്നുള്ള കുഴിയിലേക്ക് മറിഞ്ഞു. ബസിന്റെ ആക്സിൽ പൂർണ്ണമായും തകർന്നിട്ടുണ്ട്. എസ്‍യുവിയുടെ മുൻഭാ​ഗവും റൂഫും പൂർണ്ണമായും തകർന്നു. കാറിന്റെ ചിത്രങ്ങൾ സമൂഹമാദ്ധ്യമങ്ങളിൽ പ്രചരിച്ചതോടെ വാഹനത്തിന്റെ സുരക്ഷയുമായി ബന്ധപ്പെട്ട് ചർച്ചകൾ ആരംഭിച്ചിരിക്കുകയാണ്. ക്രാഷ് ടെസ്റ്റിൽ 5 സ്റ്റാർ ലഭിച്ച വാഹനമാണ് തകർന്നിരിക്കുന്നതെന്ന് ചിലർ കുറ്റപ്പെടുത്തുകയും പരിഹസിക്കുകയും ചെയ്തതോടെ മറുഭാ​ഗം ക്രാഷ് ടെസ്റ്റ് സംബന്ധിച്ചും വാഹനത്തിന്റെ മികവ് ചൂണ്ടിക്കാട്ടിയും രം​ഗത്തു വന്നു. എസ്‍യുവി പൂർണ്ണമായും തകരണമെങ്കിൽ, ആക്സിൽ അടക്കം തകർന്ന് ബസ് കുഴിയിൽ ചെന്ന് പതിക്കണമെങ്കിൽ കാർ ചിന്തിക്കാൻ പോലും കഴിയാത്ത അത്രയും വേ​ഗത്തിൽ വന്ന് നിയന്ത്രണം വിട്ടതാകാണം എന്ന് വാഹനപ്രേമികൾ ചൂണ്ടിക്കാണിക്കുന്നു.

ഇന്ത്യൻ വിപണിയിലിറങ്ങിയ എസ്‍യുവികളിൽ ക്രാഷ് ടെസ്റ്റിൽ 5 സ്റ്റാർ സ്വന്തമാക്കിയ വാഹനങ്ങളിലൊന്നാണ് മഹീന്ദ്ര എസ്‍യുവി 700. ഗ്ലോബൽ എൻസിഎപിയുടെ ക്രാഷ് ടെസ്റ്റുകളിൽ മുതിർന്ന യാത്രക്കാരുടെ സുരക്ഷയിൽ 5-സ്റ്റാറും കുട്ടികളുടെ സംരക്ഷണത്തിൽ 4-സ്റ്റാർ റേറ്റിംഗുമാണ് മഹീന്ദ്ര XUV700 നേടിയത്. മുതിർന്ന യാത്രക്കാരുടെ സുരക്ഷയിൽ 17 പോയിന്റിൽ 16.03 പോയിന്റ് വാഹനം സ്വന്തമാക്കിയിരുന്നു. ഗ്ലോബൽ എൻസിഎപി ക്രാഷ് ടെസ്റ്റ് ചെയ്തിട്ടുള്ള ഏറ്റവും സുരക്ഷിതമായ ഇന്ത്യൻ നിർമ്മിത കാറാണ് മഹീന്ദ്ര XUV700. 7 എയർബാഗുകൾ, ESP, ADAS എന്നിങ്ങനെ അധിക സുരക്ഷാ സവിശേഷതകളുള്ള ഏറ്റവും മികച്ച എസ്‍യുവിയാണ് മഹീന്ദ്ര XUV700 എന്ന് എൻസിഎപി പറഞ്ഞിരുന്നു.

വലിയ സുരക്ഷ സംവിധാനങ്ങൾ വാ​ഗ്ദാനം ചെയ്യുന്ന വാഹനം എങ്ങനെയാണ് വലിയ അപകടം വരുത്തി വെച്ചതെന്ന് പലരും ചോദിക്കുന്നു. അതിന് വിദ​​ഗ്ദരും വാഹനപ്രേമികളും കൃത്യമായ ഉത്തരവും നൽകുന്നു. എത്ര സുരക്ഷ പ്രധാനം ചെയ്യുന്ന വാഹനമാണെങ്കിലും അളവിൽ കവിഞ്ഞ അമിത വേ​ഗതയും നിയന്ത്രണമില്ലായ്മയും ആഘാതവും യാത്രക്കാരുടെ ജീവനെടുക്കും. ഒരു വാഹനം ക്രാഷ് ടെസ്റ്റ് നടത്തുക 64 കിലോമീറ്റർ വേ​ഗതയിലാണ്. മഹീന്ദ്ര XUV700 പരമാവധി സ്പീഡ് 200kmph ആണ്. തിരുപ്പൂരിൽ നടന്ന അപകടം അനിയന്ത്രിതമായ വേ​ഗതയിൽ വന്നതുകൊണ്ട് മാത്രം സംഭവിച്ചതാണ്. വാഹനം 150 kmph-ൽ അധികം വേ​ഗതയിലാണ് എത്തിയത്. അതിനാൽ തന്നെ ചിന്തിക്കാൻ കഴിയാത്ത അത്രയും വലിയ ആഘാതമാണ് വാഹനത്തിന് സംഭവിച്ചിരിക്കുന്നത്. ആക്സിൽ പൂർണ്ണമായും തകർത്ത് ബസിനെ റോഡിൽ നിന്നും തെറിപ്പിക്കണമെങ്കിൽ വാഹനത്തിന്റെ സ്പീഡ് മാത്രമല്ല കരുത്തുമാണ് തെളിയുന്നത്. എത്ര വലിയ സുരക്ഷ സംവിധാനങ്ങൾ ഒരുക്കിയാലും തെറ്റായ ഡ്രൈവിം​ഗ് അപകടം വിളിച്ചു വരുത്തുമെന്നാണ് തമിഴ്നാട്ടിലുണ്ടായ അപകടം ചൂണ്ടിക്കാണിക്കുന്നത്.