കാബൂൾ: അഫ്ഗാനിസ്ഥാനിൽ താലിബാൻ ഭരണം പിടിച്ചിട്ട് ഒരു വർഷം തികയുകയാണ്. യുദ്ധത്തിന്റെ കണ്ണീർ കാഴ്ചകൾ ഇന്നും ഒരു ജനതയെ വീർപ്പുമുട്ടിക്കുകയാണ്. തകർന്നടിഞ്ഞ കെട്ടിടങ്ങൾ, വ്യാപാര സ്ഥാപനങ്ങൾ , ക്രൂരമായി കൊലചെയ്യപ്പെട്ട മനുഷ്യ ജീവനുകൾ എല്ലാം അഫ്ഗാൻ ജനതയുടെ നീറുന്ന ഓർമകളാണ്. കടുത്ത പ്രതിസന്ധി നേരിടുന്ന രാജ്യത്ത് ജനങ്ങൾ ജീവിക്കാനായി നിലവിളിക്കുകയാണ്. താലിബാൻ ജനങ്ങളോട് യാതൊരുവിധ ദയ ഇല്ലാതെയാണ് പെരുമാറുന്നതെന്ന് മാദ്ധ്യമങ്ങൾ റിപ്പോർട്ട് ചെയ്യുന്നു. 2021 ഓഗസ്റ്റ് 15-നാണ് അഫ്ഗാനിസ്ഥാനിൽ താലിബാൻ ഭരണം പിടിക്കുന്നത്.
അഫ്ഗാനിസ്ഥാൻ നിലവിൽ ലോകത്തിലെ ഏറ്റവും മോശം മാനുഷിക അവസ്ഥയിലൂടെയാണ് കടന്നു പോകുന്നതെന്ന് ഐക്യരാഷ്‌ട്രസഭ അഭിപ്രായപ്പെട്ടു. ആശുപത്രികളിൽ ജനിച്ചു വീഴുന്ന കുട്ടികൾക്ക് പോളിയോ നല്കാൻ തയ്യാറാകാത്തത് മൂലം നിരവധി കുഞ്ഞുങ്ങൾ മരണപ്പെടുകയും , വൈകല്യങ്ങൾ സംഭവിക്കുകയും ചെയ്യുന്നു. കഴിഞ്ഞ മാസം മൂസ ഖല ജില്ലയിൽ കോളറ ബാധിച്ചവരെ ഒരു സ്ഥലത്തു അടച്ചു പൂട്ടിയിടുന്ന സാഹചര്യം ഉണ്ടായി. ഓരോ ദിവസം കഴിയുന്തോറും കോളറ രോഗികളുടെ എണ്ണം പെരുകി വരികയാണ് അഫ്ഗാനിൽ.
പ്രസവം കഴഞ്ഞ സ്ത്രീകളിൽ കുത്തിവെക്കുന്നതിനായി തുരുമ്പിച്ച സിറിഞ്ചാണ് ഉപയോഗിക്കുന്നത്. ഇത്തരം സംഭവങ്ങൾ കൂടി വന്നതോടെ ജനങ്ങൾ ആശുപത്രി അധികൃതരെ ആക്രമിക്കുകയും തുടർന്ന് ആശുപത്രി അടച്ച് പൂട്ടിക്കുകയും ചെയ്തു. രാജ്യത്തെ ആശുപത്രികൾക്ക് പ്രവർത്തിക്കാനുള്ള യാതൊരു സംവിധാനങ്ങളും താലിബാൻ നൽകുന്നില്ല എന്നാണ് ആശുപത്രി അധികൃതർ ഇതിന് മറുപടിയായി പറയുന്നത്.
പോഷകാഹാരമുള്ള ഭക്ഷണം ലഭിക്കാത്തത് മൂലം നിരവധി പട്ടിണി മരണങ്ങളും കടുത്ത ദാരിദ്ര്യവുമാണ് അഫ്ഗാൻ നേരിടുന്നത്. റഷ്യ യുക്രെയ്‌നിൽ അധിനിവേശം നടത്തിയത് മൂലം അഫ്ഗാനിസ്ഥാനിൽ പണപ്പെരുപ്പവും , തൊഴലില്ലായ്മയും രൂക്ഷമായിരിക്കുകയാണെന്ന് മാദ്ധ്യമങ്ങൾ റിപ്പോർട്ട് ചെയ്യുന്നു. അഫ്ഗാനിസ്ഥാനിൽ താലിബാൻ ഭരണം പിടിച്ചെടുത്തതോടെ ഏകദേശം 35 ദശലക്ഷം ജനങ്ങൾ ദുരിതത്തിലായി. ലോകരാജ്യങ്ങൾ അഫ്ഗാനിലെ വ്യാപാര സംരംഭങ്ങൾ പൂർണ്ണമായും അവസാനിപ്പിച്ചു. നിക്ഷേപം നിർത്തലാക്കി.ചരക്കു വ്യാപാര കരാർ മരവിപ്പിച്ച സാഹചര്യം ഉണ്ടായി. അഫ്ഗാനിസ്ഥാനെ പിടിച്ചു നിർത്തുന്ന വിദേശ സഹായങ്ങളൊക്കെ ഒറ്റ രാത്രി കൊണ്ട് നിർത്തി. ഇതെല്ലം അഫ്ഗാനിസ്ഥാനെ കടുത്ത പ്രതിസന്ധിയിലേക്ക് നയിച്ചു.
സ്ത്രീകൾക്ക് വിദ്യാഭ്യാസം, തൊഴിൽ എന്നിവ പൂർണ്ണമായും നിരോധിച്ചു. ഇതിനെതിരെ പ്രതിഷേധിച്ചവരെ കൊന്നുതളളാനും താലിബാൻ ഭീകരർ മടിക്കുന്നില്ല. സാമ്പത്തികവും സാമൂഹികമായും കടുത്ത അരക്ഷിതാവസ്ഥ നേരിടുകയാണ് അഫ്ഗാനിസ്ഥാൻ. താലിബാൻ ഭരണം തുടങ്ങിയതിന് ശേഷം ലോക രാജ്യങ്ങൾ അഫ്ഗാനിസ്ഥാനെ പുറന്തള്ളിക്കഴിഞ്ഞു. ഇനിയും പിടിച്ചു നില്ക്കാൻ ജനങ്ങൾക്കാവില്ല എന്നാണ് ഓരോ ദിവസവും പുറത്ത് വരുന്ന സംഭവങ്ങളിൽ നിന്നും മനസ്സിലാകുന്നത്. തോക്കു ധാരികളായ ഭീകരവാദികൾ അഫ്ഗാനിസ്ഥാൻ കാർന്നു തിന്നുകൊണ്ടിരിക്കുകയാണെന്ന് മാദ്ധ്യമങ്ങൾപറയുന്നു.
