കോൺഗ്രസ് എംഎൽഎയുടെ മരുമകൻ മദ്യപിച്ച് കാറോടിച്ചു, പിന്നാലെ വാഹനങ്ങളിലേക്ക് ഇടിച്ചുകയറി; ആറ് പേർ കൊല്ലപ്പെട്ടു

അഹമ്മദാബാദ് : കോൺഗ്രസ് എംഎൽഎയുടെ മരുമകന്റെ കാർ ഇടിച്ച് ആറ് പേർ കൊല്ലപ്പെട്ടു. ഗുജറാത്തിലെ ആനന്ദ് ജില്ലയിലാണ് സംഭവം. എസ്‌യുവി കാർ ഓട്ടോറിക്ഷയിലേക്കും ബൈക്കിലേക്കും ഇടിച്ച് കയറുകയായിരുന്നു. സോജിത്ര മണ്ഡലത്തിൽ നിന്നുള്ള കോൺഗ്രസ് എംഎൽഎ പുനംഭായ് മദാഭായ് പർമറിന്റെ മരുമകൻ ഖേതൻ പധ്യാറിന്റെ കാറാണ് അപകടത്തിൽ പെട്ടത്.

ആനന്ദ് നഗരത്തിലെ സംസ്ഥാന പാതയിൽ സോജിത്ര ഗ്രാമത്തിന് സമീപമാണ് അപകടമുണ്ടായത്. കാർ പിന്നിൽ നിന്ന് വന്ന് ഓട്ടോറിക്ഷയെയും ബൈക്കിനെയും ഇടിക്കുകയായിരുന്നു. എംഎൽഎയുടെ മരുമകൻ മദ്യപിച്ച നിലയിലായിരുന്നുവെന്നാണ് പ്രാഥമിക വിവരം. വൈകീട്ട് ഏഴ് മണിയോടെയാണ് അപകടം നടന്നത്. കാറിൽ ഉണ്ടായിരുന്ന നാല് പേരും ബൈക്കിൽ ഉണ്ടായിരുന്ന രണ്ട് പേരും മരിച്ചു. കാറിന്റെ ഡ്രൈവർ ആശുപത്രിയിലാണ്.

നവഗഢ് ഗ്രാമത്തിലെ താമസക്കാരായ ജിയാബെൻ മിസ്ത്രി, ജാൻവിബെൻ മിസ്ത്രി, ഇവരുടെ അമ്മ വിനാബെൻ മിസ്ത്രി, ഓട്ടോറിക്ഷാ ഡ്രൈവറായ യാസൻ വോറ, ആനന്ദ് സ്വദേശികളായ യോഗേഷ് ഒഡ്, സന്ദീപ് ഒഡ് എന്നിവരാണ് മരിച്ചത്. വിനാബെൻ, ജിയ, ജാൻവി എന്നിവർ ഓട്ടോറിക്ഷയിലും യോഗേഷും സന്ദീപും മോട്ടോർ സൈക്കിളിലും യാത്ര ചെയ്യുകയായിരുന്നു. നാലുപേർ സംഭവസ്ഥലത്തുവെച്ചും രണ്ടുപേർ ആശുപത്രിയിൽ ചികിത്സയിലിരിക്കെയുമാണ് മരിച്ചത്.