രാജ്യം 75-ാം സ്വാതന്ത്ര്യദിനം ആഘോഷിക്കുമ്പോൾ അതിൽ പങ്കാളിയായി മലയാള ചലചിത്രമേഖലയും.സ്വാതന്ത്ര്യ ദിന ആശംസകളുമായി ഷാജി കൈലാസ് ചിത്രം കാപ്പയുടെ പ്രത്യേക പോസ്റ്റർ പുറത്ത് വിട്ടു. പൃഥ്വിരാജ് നായകനാകുന്ന ചിത്രത്തിന്റെ പോസ്റ്റർ പുറത്ത് വിട്ടത് ഷാജി കൈലാസ് തന്നെയാണ്.
കൊട്ട മധു എന്ന കഥാപാത്രമായാണ് പൃഥ്വിരാജ് ചിത്രത്തിൽ എത്തുന്നത്. അപർണ ബാലമുരളിയാണ് നായിക വേഷം കൈകാര്യം ചെയ്യുന്നത്. ഇവർക്ക് പുറമെ ആസിഫ് അലിയും, അന്ന ബെന്നും സിനിമയിൽ പ്രധാന കഥാപാത്രങ്ങളായി എത്തുന്നുണ്ട്.ജി ആർ ഇന്ദുഗോപൻ എഴുതിയ ‘ശംഖുമുഖി’ എന്ന നോവലിനെ ആസ്പദമാക്കിയുള്ളതാണ് ചിത്രം. ഇന്ദു ഗോപൻ തന്നെയാണ് ചിത്രത്തിന്റെ തിരക്കഥ എഴുതുന്നത്.
ജിനു എബ്രഹാം, ഡോൾവിൻ കുര്യാക്കോസ്, ദിലീഷ് നായർ എന്നിവരുടെ പങ്കാളിത്തത്തിൽ ആരംഭിച്ച തിയറ്റർ ഓഫ് ഡ്രീംസ്, ഫെഫ്കെ റൈറ്റേഴ്സ് യൂണിയന്റെ സഹകരണത്തിലാണ് ചിത്രം നിർമിക്കുന്നത്.തിരുവനന്തപുരം നഗരത്തിലെ മാഫിയ ഗ്യാങുകളുടെ കഥയാണ് സിനിമ പറയുന്നത്. തിരുവനന്തപുരം തന്നെയാണ് ചിത്രത്തിന്റെ പശ്ചാത്തലം. കടുവയാണ് ഷാജി കൈലാസും പൃഥ്വിരാജും ഏറ്റവും ഒടുവിൽ ഒന്നിച്ച ചിത്രം. ‘കടുവക്കുന്നേൽ കുരിയച്ചൻ’ എന്ന കഥാപാത്രമായിട്ടാണ് പൃഥ്വിരാജ് ഈ ചിത്രത്തിൽ എത്തിയത്.
Comments