ചെന്നൈ: തമിഴ്നാട്ടിൽ ഭർത്താവിനെ ഗുരുതരമായി പൊള്ളലേൽപ്പിച്ച് ഭാര്യ. യുവാവിന് സഹപ്രവർത്തകയുമായി അവിഹിത ബന്ധമുണ്ടെന്ന് ആരോപിച്ചായിരുന്നു ഭാര്യയുടെ ആക്രമണം. 32-കാരനായ തങ്കരാജ് ഉറങ്ങാൻ കിടന്നപ്പോൾ തിളച്ച വെള്ളം കൊണ്ടുവന്ന് ജനനേന്ദ്രിയത്തിലേക്ക് ഒഴിക്കുകയായിരുന്നു. ആക്രമണത്തിൽ തങ്കരാജിന്റെ നെഞ്ചിലും മുഖത്തും ജനനേന്ദ്രയത്തിനും ഉൾപ്പെടെ ഗുരുതരമായി പൊള്ളലേറ്റിട്ടുണ്ട്.
തമിഴ്നാട്ടിലെ പുതുപാട്ട് സ്വദേശിയാണ് തങ്കരാജ്. 29-കാരിയായ ഭാര്യ പ്രിയയാണ് ഭർത്താവിനെ അതിക്രൂരമായി പൊള്ളലേൽപ്പിച്ചത്. ഏഴ് വർഷം മുമ്പായിരുന്നു ഇരുവരും തമ്മിലുള്ള വിവാഹം. ഇവർക്ക് രണ്ട് പെൺമക്കളുമുണ്ട്.
ഒരു മൊബൈൽ നിർമാണ കമ്പനയിൽ സൂപ്പർവൈസറാണ് തങ്കരാജ്. തൊഴിൽ സ്ഥലത്തെ മറ്റൊരു ജീവനക്കാരിയുമായി തങ്കരാജിന് ബന്ധമുണ്ടെന്ന് ആരോപിച്ച് കഴിഞ്ഞ ഏതാനും നാളുകളായി പ്രിയയുമായി തർക്കം നിലനിന്നിരുന്നു. സമാന വിഷയത്തിൽ കഴിഞ്ഞ രാത്രിയും ഭാര്യയുമായി വാക്കുതർക്കമുണ്ടായി. ഇതിന് പിന്നാലെ തങ്കരാജ് ഉറങ്ങാൻ കിടന്നു. എന്നാൽ ദേഷ്യത്തിലായിരുന്ന ഭാര്യ പ്രിയ വെള്ളം തിളപ്പിച്ച് കൊണ്ടുവരികയും തങ്കരാജിന്റെ ജനനേന്ദ്രിയത്തിലേക്ക് ഒഴിക്കുകയും ചെയ്തു.
ഗുരുതരമായി പൊള്ളലേറ്റ് നിലവിളിച്ച് കരഞ്ഞ തങ്കരാജിനെ അയൽവാസികൾ എത്തിയാണ് രാത്രി ആശുപത്രിയിൽ കൊണ്ടുപോയത്. യുവാവിന് 50 ശതമാനം പൊള്ളലേറ്റതായി വലജപേട്ട് ആശുപത്രിയിലെ ഡോക്ടർമാർ അറിയിച്ചു. ഭാര്യ പ്രിയക്കെതിരെ ഐപിസി പ്രകാരമുള്ള വിവിധ വകുപ്പുകൾ ചുമത്തി കാവേരിപക്കം പോലീസ് കേസെടുത്തിട്ടുണ്ട്. സംഭവത്തിൽ അന്വേഷണം പുരോഗമിക്കുകയാണ്.
