തിരുവനന്തപുരം : ഓട്ടോ ഡ്രൈവർമാരുടെ അശ്രദ്ധ മൂലം അപകടങ്ങൾ ഉണ്ടാകുന്ന സാഹചര്യത്തിൽ സുരക്ഷാ മാർഗനിർദ്ദേശങ്ങൾ പാലിക്കണമെന്ന നിർദ്ദേശവുമായി കേരള പോലീസ്. ആരാലും പ്രവചിക്കാൻ കഴിയാത്ത, ചടുലമായ നീക്കങ്ങൾ നടുറോഡിൽ നടത്തുന്ന ചില ഓട്ടോഡ്രൈവർമാർ മൂലം പഴി കേൾക്കുന്നത് മുഴുവൻ ഡ്രൈവർമാരുമാണെന്ന് കേരള പോലീസ് ഫേസ്ബുക്ക് പോസ്റ്റിലൂടെ പറഞ്ഞു. വീഡിയോ പങ്കുവെച്ചുകൊണ്ടാണ് പോലീസിന്റെ നിർദ്ദേശം.
ഓട്ടോ ഡ്രൈവർമാർ ഇൻഡിക്കേറ്റർ ഇടാതെ, സിഗ്‌നൽ നൽകാതെ, പുറകിൽ നിന്ന് വരുന്ന വാഹനങ്ങളെ ശ്രദ്ധിക്കാതെ പെട്ടെന്ന് വെട്ടിത്തിരിക്കുന്നതിലൂടെ അപകടസാദ്ധ്യത വർദ്ധിക്കുന്നുണ്ട്. അപ്രതീക്ഷിത യു-ടേൺ എടുക്കൽ മൂലം പുറകിൽ നിന്ന് വരുന്ന വാഹനങ്ങൾക്ക് പെട്ടെന്ന് ബ്രേക്ക് ചെയ്യേണ്ടിവരുകയും നിയന്ത്രണം നഷ്ടപ്പെടുകയും ചെയ്യുന്നു.
മൂന്ന് വീലിൽ ഓടുന്നതിനാൽ എളുപ്പം തിരിക്കാവുന്ന വാഹനമാണ് ഓട്ടോറിക്ഷ. എന്നാൽ അതേ പോലെ തന്നെ എളുപ്പം മറിയാനിടയുള്ള വാഹനവുമാണ് ഓട്ടോറിക്ഷ. യു ടേൺ എടുക്കുന്നതിന് മുൻപ് ഇൻഡിക്കേറ്റർ ഇട്ട് റോഡിൽ ഇടതുവശം ചേർന്ന് നിന്ന ശേഷം, വണ്ടി വലത്തോട്ട് തിരിയാൻ പോകുകയാണ് എന്ന് ആംഗ്യഭാഷയിലും സിഗ്‌നൽ കാണിച്ച ശേഷം പുറകിൽ നിന്ന് വാഹനങ്ങൾ വരുന്നില്ല എന്ന് ഉറപ്പുവരുത്തി യു ടേൺ എടുക്കണമെന്നും നിർദ്ദേശത്തിൽ പറയുന്നു.
Comments