ന്യൂഡൽഹി: മദ്യകുംഭകോണ കേസിൽ ഡൽഹി ഉപമുഖ്യമന്ത്രി മനീഷ് സിസോദിയ ഉൾപ്പെടെ ഉള്ളവർക്കെതിരെ ലുക്കൗട്ട് നോട്ടീസ് പുറപ്പെടുവിച്ച് സി ബി ഐ. ഇതിനെതിരെ പ്രതികരണവുമായി ആം ആദ്മി പാർട്ടി നേതാക്കൾ കൂട്ടത്തോടെ രംഗത്തെത്തി. സി ബി ഐയുടെയും ഇഡിയുടെയും നീക്കങ്ങൾ രാജ്യത്തിന്റെ പുരോഗതിക്ക് എതിരാണെന്ന് ഡൽഹി മുഖ്യമന്ത്രി അരവിന്ദ് കെജ്രിവാൾ അഭിപ്രായപ്പെട്ടു.
ലുക്കൗട്ട് നോട്ടീസിന് പിന്നിൽ പ്രധാനമന്ത്രി നരേന്ദ്ര മോദിയാണ് എന്നാണ് മനീഷ് സിസോദിയയുടെ ആദ്യ പ്രതികരണം. രാജ്യം നേരിടുന്ന പ്രശ്നങ്ങൾ പരിഹരിക്കാൻ ഒരു നേതാവ് വരാൻ തയ്യാറെടുക്കുകയായിരുന്നു. ഈ സാഹചര്യത്തിൽ ഇത്തരം പ്രവൃത്തികൾ ചെയ്യുന്നത് ശരിയല്ലെന്നും സിസോദിയ പറഞ്ഞു. ഇത്തരക്കാർക്കെതിരെ 2024ൽ ജനങ്ങൾ ലുക്കൗട്ട് നോട്ടീസ് നൽകുമെന്നും സിസോദിയ പറഞ്ഞു.
മദ്യകുംഭകോണ കേസിൽ ഡൽഹി ഉപമുഖ്യമന്ത്രി മനീഷ് സിസോദിയ ഉൾപ്പെടെ 15 പ്രതികളെ എഫ്‌ഐആറിൽ ഉൾപ്പെടുത്തിയാണ് സി ബി ഐ കേസ് രജിസ്റ്റർ ചെയ്തിരിക്കുന്നത്. കഴിഞ്ഞ നവംബറിൽ പുറത്തിറക്കിയ ഡൽഹി എക്സൈസ് നയം നടപ്പാക്കുന്നതിൽ ക്രമക്കേട് നടന്നുവെന്ന കണ്ടെത്തലിനെ തുടർന്നാണ് എഫ് ഐ ആർ. സർക്കാരിന്റെ പുതുക്കിയ എക്സൈസ് നയത്തെക്കുറിച്ച് കഴിഞ്ഞ മാസം ഡൽഹി ലെഫ്റ്റനന്റ് ഗവർണർ വിനയ് കുമാർ സക്‌സേന സിബിഐ അന്വേഷണത്തിന് ശുപാർശ ചെയ്തിരുന്നു. തുടർന്നാണ് സിബിഐ അന്വേഷണം ആരംഭിച്ചത്.
Comments