അതിർത്തിയിൽ കൊല്ലപ്പെട്ട ഭീകരരുടെ പക്കൽ നിന്നും കണ്ടെടുത്തത് ചൈനീസ് നിർമ്മിത ആയുധങ്ങൾ; പാക് ഭീകരരും ചൈനീസ് സൈന്യവും തമ്മിലുള്ള ബന്ധത്തിന് തെളിവെന്ന് നിരീക്ഷണം- Chinese made M-16 weapon recovered from Pak infiltrators killed in Uri

ശ്രീനഗർ: നിയന്ത്രണ രേഖയ്‌ക്ക് സമീപം ഉറിയിൽ നടന്ന ഏറ്റുമുട്ടലിൽ കൊല്ലപ്പെട്ട പാകിസ്താൻ ഭീകരരുടെ പക്കൽ നിന്നും ചൈനീസ് നിർമ്മിത എം-16 തോക്ക് പിടിച്ചെടുത്തു. സംഭവം അസ്വാഭാവികമെന്ന് സൈനിക വൃത്തങ്ങൾ പ്രതികരിച്ചു. മൂന്ന് നുഴഞ്ഞു കയറ്റക്കാരായിരുന്നു ബുധനാഴ്ച നടന്ന ഏറ്റുമുട്ടലിൽ കൊല്ലപ്പെട്ടത്.

കമാൽകോട്ട് മേഖലയിലൂടെ ഇന്ത്യയിലേക്ക് നുഴഞ്ഞു കയറാൻ ശ്രമിച്ച പാക് ഭീകരരെയാണ് സൈന്യം വകവരുത്തിയത്. ഭീകരരും പാകിസ്താൻ സൈന്യവും ചൈനീസ് സൈന്യവും അതിർത്തിയിൽ ഇന്ത്യക്കെതിരെ കൈകോർക്കുന്നതായി നേരത്തേ വാർത്തകൾ ഉണ്ടായിരുന്നു. ഈ സാദ്ധ്യത മുൻനിർത്തിയാണ് സൈന്യവും അന്വേഷണം നടത്തുന്നത്. ഇതിന് മുൻപും സമാനമായ രീതിയിൽ പാക് ഭീകരരുടെ പക്കൽ നിന്നും ചൈനീസ് നിർമ്മിത ആയുധങ്ങൾ പിടികൂടിയിരുന്നു.

ഇന്ത്യൻ സൈനികർക്ക് നേരെ ചാവേറാക്രമണം നടത്താൻ പാകിസ്താൻ സൈന്യം കൈക്കൂലി നൽകിയതായി അതിർത്തിയിൽ പിടിയിലായ മറ്റൊരു ഭീകരൻ വെളിപ്പെടുത്തിയിരുന്നു. പാകിസ്താൻ ആർമി കേണൽ യൂനുസ് മുപ്പതിനായിരം രൂപ കൈക്കൂലി നൽകി എന്നായിരുന്നു ലഷ്കർ ഭീകരൻ തബറാക് ഹുസൈന്റെ വെളിപ്പെടുത്തൽ. ഇയാൾ നേരത്തേ പാകിസ്താൻ സൈന്യത്തിന്റെ രഹസ്യാന്വേഷണ വിഭാഗത്തിലെ ഉദ്യോഗസ്ഥനായിരുന്നു. അതിർത്തിയിൽ നുഴഞ്ഞു കയറുന്ന ഭീകരർക്ക് പാകിസ്താൻ സൈന്യം പിന്തുണ നൽകുന്നുണ്ട് എന്ന ഇന്ത്യൻ കണ്ടെത്തലിന് ശക്തമായ സാധൂകരണം നൽകുന്നതായിരുന്നു തബറാക് ഹുസൈന്റെ കുറ്റസമ്മതം.