വിരാട് കൊഹ് ലിയെ കാണാനെത്തി പാക് താരം; കൈയ്യൊപ്പിട്ട ജെഴ്‌സി സമ്മാനമായി നൽകി കൊഹ് ലി; വീഡിയോ ഏറ്റെടുത്ത് ആരാധകർ

ദുബൈ : പാക് ക്രിക്കറ്റ് താരം ഹാരിസ് റൗഫിന് വിരാട് കൊഹ് ലിയുടെ സ്‌നേഹസമ്മാനം. തന്റെ കൈയ്യൊപ്പിട്ട ഇന്ത്യൻ ടീമിന്റെ ജെഴ്‌സിയാണ് കൊഹ് ലി സമ്മാനമായി നൽകിയത്. ദുബൈയിൽ കഴിഞ്ഞ ദിവസം ഏഷ്യാ കപ്പിലെ ഇന്ത്യ – പാക് മത്സരത്തിന് പിന്നാലെ കൊഹ്ലിയെ കണ്ട് സൗഹൃദം പുതുക്കാൻ ഹാരിസ് റൗഫ് എത്തുകയായിരുന്നു.

ഇരുവരും വർത്തമാനം പറയുന്നതും ജെഴ്‌സി കൈമാറുന്നതിന്റെയും വീഡിയോ ബിസിസിഐ ട്വിറ്ററിൽ പങ്കെവെച്ചിട്ടുണ്ട്. കൊഹ് ലിയുടെ 18 ാം നമ്പർ ജെഴ്‌സിയാണ് കൈമാറിയത്. കളി ഒരു പക്ഷെ കഴിയുമായിരിക്കും പക്ഷെ ഇതുപോലുളള നിമിഷങ്ങൾ പ്രകാശഭരിതമായി തിളങ്ങും എന്ന വാക്കുകളോടെയാണ് ബിസിസിഐ ട്വിറ്ററിൽ വീഡിയോ പങ്കുവെച്ചിരിക്കുന്നത്.

ദുബൈ അന്താരാഷ്‌ട്ര ക്രിക്കറ്റ് സ്റ്റേഡിയത്തിൽ നടന്ന മത്സരത്തിൽ പാകിസ്താനെ അഞ്ച് വിക്കറ്റിന് ഇന്ത്യ തകർത്തിരുന്നു. കൊഹ് ലിയുടെ നൂറാം ട്വന്റി -20 മത്സരമായിരുന്നു ഇത്. 36 പന്തിൽ നിന്ന് 35 റൺസാണ് കൊഹ് ലി നേടിയത്.

The match may be over but moments like these shine bright ✨👌

A heartwarming gesture by @imVkohli as he hands over a signed jersey to Pakistan's Haris Rauf post the #INDvPAK game 👏👏#TeamIndia | #AsiaCup2022 pic.twitter.com/3qqejMKHjG

— BCCI (@BCCI) August 29, 2022

2019 ൽ ഓസ്‌ട്രേലിയയിൽ വെച്ച് വിരാട് കൊഹ് ലിക്ക് നെറ്റിൽ പരിശീലനത്തിനായി പന്തെറിഞ്ഞു കൊടുക്കുന്ന ഹാരിസ് റൗഫിന്റെ വീഡിയോ നേരത്തെ തരംഗമായിരുന്നു. ഇതിന് ശേഷം ഓസ്‌ട്രേലിയൻ ക്ലബ്ബ് ക്രിക്കറ്റിൽ ഉൾപ്പെടെ ഹാരിസ് റൗഫിന് അവസരം ലഭിച്ചതും വാർത്തയായിരുന്നു.