ഇരുചക്ര വാഹന വിപണിയിലെ രാജാവായ റോയൽ എൻഫീൽഡിന്റെ ഏറ്റവും പുതിയ മോഡൽ പുറത്തിറക്കി. ഏതു കാട്ടിലും മലയിലും വേട്ടയ്ക്ക് പോകാൻ തയ്യാറായ ഇവന്റെ പേര് തന്നെ രാജകീയമാണ്. റോയൽ എൻഫീൽഡിന്റെ ഹണ്ടർ 350 ഇന്ത്യൻ റോഡുകളിൽ പായുന്ന ഇരുചക്ര വാഹങ്ങളുടെ മുൻ നിരയിൽ ഇടം പിടിക്കുമെന്ന് ഉറപ്പാണ്.
ആധുനികമായ രീതിയിൽ രൂപകൽപ്പന ചെയ്ത ഹണ്ടർ 350 രണ്ട് വേരിയന്റുകളിലായാണ് കമ്പനി പുറത്തിറക്കുന്നത്. ഒരു റോയൽ എൻഫീൽഡ് ആരാധകന് ഉൾക്കൊള്ളാൻ കഴിയുന്ന വിലയിലാണ് കമ്പനി വാഹനം പുറത്തിറക്കിയിരിക്കുന്നത്. റോയൽ എൻഫീൽഡ് റെട്രോ വേരിയന്റിന് എക്സ് ഷോറൂം വില 1.50 ലക്ഷം രൂപയും , മെട്രോ വേരിയന്റിന് 1.68 ലക്ഷം രൂപയുമാണ് വിലയിട്ടിരിക്കുന്നത്.
രാത്രി വേട്ടക്കാരന്റെ കയ്യിലെ ടോർച്ചിന്റെ വെളിച്ചം പോലെ പ്രകാശ പരത്തുന്ന വൃത്താകൃതിയിലുള്ള ഹാലജൻ ഹെഡ്ലാബ്, ചെറുതും ആകർഷണം തോന്നിപ്പിക്കുന്ന ടെയിൽ ലാബ്, 17 ഇഞ്ചിൽ കാഴ്ചക്കാരുടെ മനം കവരുന്ന വലുപ്പമുള്ള ചക്രങ്ങളും ഇവന്റെ മാത്രം പ്രത്യേകതകളാണ്.
വാഹനം 20.2 bhp കരുത്തും 27 Nm ടോര്ക്കും , 349 CC-യിലുമാണ് പുറത്തിറക്കുന്നത്. മുൻ മോഡലുകളിൽ ഉപയോഗിച്ചിരുന്ന എയർ ഓയിൽ കൂൾഡ് എഞ്ചിൻ തന്നെയാണ് ഹണ്ടർ 350ലും ഉപയോഗിക്കുന്നത്. 5-സ്പീഡ് ഗിയർ സസ്പെഷനിൽ പുറത്തിറങ്ങുന്ന ഹണ്ടർ 350ക്ക് ഇതിനോടകം മികച്ച വരവേൽപ്പാണ് ലഭിക്കുന്നതെന്ന് കമ്പനി അധികൃതർ പറഞ്ഞു.
റോയൽ എൻഫീൽഡ് ശ്രേണിയിൽ ആകർഷകമായ മാറ്റങ്ങൾ വരുത്തിയാണ് ഓരോ മോഡലും കമ്പനി പുറത്തിറക്കുന്നത്. യുവാക്കൾക്ക് ഹരം പകരുന്ന വ്യത്യസ്തമായ ഡിസൈനുകളിൽ വിപണിയിൽ ഇറങ്ങുന്ന വാഹനങ്ങൾ ഞൊടിയിടയിൽ വിറ്റു തീരുകയാണ് ചെയ്യാറുള്ളത്.
നിരവധി സീരീസ്സുകളിൽ ഇറങ്ങുന്ന വാഹനങ്ങൾ രൂപത്തിലും ഭാവത്തിലും പെർഫോമൻസിലും ജന മനസ്സുകൾ കീഴടക്കി മുന്നേറുകയാണ്. നിലവിൽ റോയൽ എൻഫീൽഡ് കമ്പനി ഇന്ത്യൻ വിപണിയിൽ ഇറക്കിയ എട്ട് മോഡലുകൾ ഇതിനോടകം ജനങ്ങൾ ഹൃദയത്തിലേറ്റി കഴിഞ്ഞു.
