ദുബായ്: ചെസ്സിൽ ഇന്ത്യൻ പ്രതിഭകൾ മുന്നേറുന്നു. ലോകചാമ്പ്യന്മാരെ മുട്ടുകുത്തിച്ച് മുന്നേറുന്ന താരങ്ങൾ ദുബായ് ഓപ്പണിലും ഇന്ത്യയുടെ പെരുമ നിലനിർത്തുകയാണ്. തുടർച്ചയായി വിജയം നേടി മുന്നേറുന്ന കൗമാര വിസ്മയം പ്രജ്ഞാനന്ദയെ മുട്ടുകുത്തിച്ച് സീനിയർ താരം ഗ്രാൻഡ് മാസ്റ്റർ അരവിന്ദ് ചിദംബരമാണ് മുന്നേറിയത്. രമേശ് ആർ.ബി എന്ന മുൻ അന്താരാഷ്ട്ര താരമാണ് ഇരുതാരങ്ങളുടേയും പരിശീലകൻ.
9 നെതിരെ 7.5 എന്ന നിലയിലാണ് അരവിന്ദ് പ്രജ്ഞാനന്ദയ്ക്കു മേൽ മേൽകൈ നേടിയത്. അവസാന റൗണ്ടിൽ വിജയിക്കാൻ ഒരു സമനില മാത്രം മതി എന്ന നിലയിലായിരുന്നു ഇരുപത്തിരണ്ടുകാരനായ അരവിന്ദ്. ഇന്ത്യയുടെ ആദ്യ ദേശീയ ട്രിപ്പിൾ ചാമ്പ്യനാണ് അരവിന്ദ് ചിദംബരം.
ടൂർണ്ണമെന്റിൽ നാലു മുതൽ ഏഴ് വരെയുള്ള സ്ഥാനങ്ങളെല്ലാം ഇന്ത്യൻ താരങ്ങൾ കയ്യടക്കി. ലോകചാമ്പ്യൻ മാഗ്നസ് കാൾസണിനെ മൂന്ന് തവണ പരാജയപ്പെടുത്തിയ പ്രജ്ഞാനന്ദ ഇന്ത്യൻ ചെസ്സിന് വലിയ കുതിപ്പാണ് നൽകിക്കൊണ്ടിരിക്കുന്നത്. വിശ്വനാഥൻ ആനന്ദിനും ഹരികൃഷ്ണനും ശേഷം കാൾസണെ തോൽപ്പിക്കുന്ന ഇന്ത്യൻ താരമെന്നതാണ് പ്രജ്ഞാനന്ദ എന്ന കൗമാരക്കാരനെ കരുത്തനാക്കുന്നത്.
Comments