തിരുവനന്തപുരം: കോൺഗ്രസ് നേതാവ് രാഹുൽ ഗാന്ധി നയിക്കുന്ന ഭാരത് ജോഡോ യാത്രയുടെ ഭാഗമായി വിശ്രമിക്കുന്ന കോൺഗ്രസ് സംഘടനാ ജനറൽ സെക്രട്ടറി കെ സി വേണുഗോപാലിന്റെ ചിത്രം പങ്കുവെച്ച് ടി.സിദ്ധിഖ്. കന്യാകുമാരിയിലെ മരച്ചുവട്ടിൽ വിശ്രമിക്കുന്ന വേണുഗോപാലിന്റെ ചിത്രമാണ് കോൺഗ്രസ് നേതാവ് സമൂഹമാദ്ധ്യമങ്ങളിൽ പങ്കുവെച്ചത്. തിരുവോണ ദിവസത്തിൽ പോലും മാറി നിൽക്കാൻ കെ സി വേണുഗോപാൽ എന്ന സംഘാടകന് കഴിയുന്നില്ല എന്നും ഭാരത് ജോഡോ യാത്ര വേണുഗോപാൽ എന്ന സംഘാടകനെ ചരിത്രത്തിൽ അടയാളപ്പെടുത്തുമെന്നും ടി സിദ്ധിഖ് പറയുന്നു.
രാജ്യം രണ്ടാം സ്വാതന്ത്ര്യ സമര പോരാട്ടത്തിലേർപ്പെട്ടിരിക്കുന്ന സമയത്ത്‌ ഒരു ആഘോഷവും കെ സി വേണുഗോപാലിന്റെ മനസ്സിലൂടെ കടന്നു പോകില്ല. അദ്ദേഹത്തിന്റെ സംഘടനാ മികവും നിലപാടും കോൺഗ്രസുകാർക്ക് അറിയാം. ആ മനുഷ്യൻ എത്ര ആത്മാർത്ഥമായി രാഹുൽ ഗാന്ധിക്കൊപ്പം നില കൊള്ളുന്നു എന്ന് പറയാതെ പറയുകയാണ് ചിത്രമെന്ന് സിദ്ധിഖ് പറയുന്നു.
രാജ്യത്തെ ഏറ്റവും സാധാരണക്കാരനെ അറിഞ്ഞു കൊണ്ട്‌ അവനെ ഒപ്പം നിർത്തി രാജ്യത്തെ ഒന്നിപ്പിക്കാനുള്ള ശ്രമമാണ് ഭാരത് ജോഡോ യാത്ര. രാജ്യത്തെ തിരിച്ച്‌ പിടിക്കാൻ നടത്തുന്ന ഈ യാത്ര സ്വതന്ത്ര ഇന്ത്യയിലെ ഏറ്റവും മികച്ച പോരാട്ടമായിരിക്കും. കോൺഗ്രസ് ചരിത്രത്തിലെ ഏറ്റവും വെല്ലുവിളി നേരിടുന്ന കാലമാണിത്. ഈ സമയം യാത്രയെ നയിക്കാൻ കരുത്തുറ്റ നേതൃത്വം ആവശ്യമാണെന്ന് സിദ്ധിഖ് പറയുന്നു. കെ സി വേണുഗോപാൽ എന്ന സംഘാടകനെ ഈ യാത്ര ചരിത്രത്തിൽ തന്നെ അടയാളപ്പെടുത്തുമെന്നും സിദ്ധിഖ് ഫേയ്സ്ബുക്കിൽ കുറിച്ചു.
Comments