കോഴിക്കോട്: ജില്ലയിൽ വീണ്ടും തെരുവ് നായയുടെ ആക്രമണം. അരക്കിണറിൽ രണ്ട് കുട്ടികൾ ഉൾപ്പെടെ മൂന്ന് പേരെ നായ കടിച്ചു. ഉച്ചയ്‌ക്ക് മൂന്നരയോടെയായിരുന്നു സംഭവം.
അരക്കിണർ സ്‌കൂളിന്റെ പരിസരത്തുവെച്ചായിരുന്നു നായയുടെ ആക്രമണം ഉണ്ടായത്. വഴിയിലൂടെ നടന്നു പോകുകയായിരുന്നു മൂന്ന് പേരും.
ആക്രമണത്തിൽ പരിക്കേറ്റവരെ കോഴിക്കോട് ബീച്ച് ആശുപത്രിയിൽ ചികിത്സയിലാണ്. മൂന്ന് പേരുടെയും പരിക്കുകൾ സാരമുള്ളതാണ്. ആക്രമണത്തിന് ഇരയായ ഒരു കുട്ടിയുടെ തുടയിലാണ് പരിക്കേറ്റിട്ടുള്ളത്. രണ്ടാമത്തെ കുട്ടിയുടെ കൈയ്‌ക്കും കാലിനും സാരമായ പരിക്കേറ്റിട്ടുണ്ട്. മുതിർന്ന ആളുടെ കൈകളിലും കാലുകളിലുമാണ് പരിക്കേറ്റിട്ടുള്ളത്.
കടിച്ച നായയെ ഇതുവരെ കണ്ടെത്താൻ കഴിഞ്ഞിട്ടില്ല. നായയ്‌ക്കായി പ്രദേശവാസികൾ തിരച്ചിൽ തുടരുകയാണ്. നായ കൂടുതൽ പേരെ ആക്രമിക്കാൻ സാദ്ധ്യതയുണ്ടെന്നാണ് പ്രദേശവാസികൾ പറയുന്നത്.
നേരത്തെ നാദാപുരത്ത് 12 കാരന് നായയുടെ കടിയേറ്റിരുന്നു. ഇതിന് പിന്നാലെയാണ് അരക്കിണറിൽ കുട്ടികളെ വീണ്ടും നായ ആക്രമിച്ചിരിക്കുന്നത്.
Comments