ന്യൂഡൽഹി: അംബേദ്കർ മുന്നോട്ടുവെച്ച ആശയങ്ങൾക്കനുസരിച്ചുള്ള മികച്ച ഭരണമാണ് നരേന്ദ്ര മോദി കാഴ്ചവെയ്‌ക്കുന്നതെന്ന് വ്യക്തമാക്കി മുൻ രാഷ്ട്രപതി റാം നാഥ് കോവിന്ദ്. അംബേദ്കർ &മോദി: റിഫോർമേഴ്‌സ് ഐഡിയാസ്, പെർഫോമേഴ്‌സ് ഇംപ്ലിമെന്റേഷൻ പുസ്തകം പ്രകാശനം ചെയ്യവേയാണ് കോവിന്ദ് പ്രധാനമന്ത്രിയെ പ്രശംസിച്ചത്.
ബ്ലൂകാർട്ട് ഡിജിറ്റൽ ഫൗണ്ടേഷനാണ് പുസ്തകം രചിച്ചിരിക്കുന്നത്. കേന്ദ്രമന്ത്രി അനുരാഗ് താക്കൂർ, മുൻ ചീഫ് ജസ്റ്റിസ് കെ ജി ബാലകൃഷ്ണൻ, കേന്ദ്ര വാർത്താവിതരണ പ്രക്ഷേപണ സഹമന്ത്രി എൽ മുരുകൻ, ബ്ലൂകാർട്ട് ഡിജിറ്റൽ ഫൗണ്ടേഷൻ ഡയറക്ടർ ഹിതേഷ് ജെയിൻ എന്നിവരുടെ സാന്നിധ്യത്തിലാണ് മുൻ രാഷ്ട്രപതി പുസ്തകം പ്രകാശനം ചെയ്തത്.
ബിആർ അംബേദ്കറുടെ യഥാർത്ഥ അനുനായി ആണ് മോദിയെന്നും കോവിന്ദ് വിശേഷിപ്പിച്ചു. മോദി ഗുജറാത്ത് മുഖ്യമന്ത്രി ആയിരുന്നപ്പോൾ നടത്തിയ ഗൗരവ് യാത്രയും റാം നാഥ് കോവിന്ദ് അനുസ്മരിച്ചു. ആനപ്പുറത്ത് ഇന്ത്യൻ ഭരണഘടനയുടെ പകർപ്പുമായി കാൽനട യാത്ര സംഘടിപ്പിച്ച മോദിയുടെ ചിത്രം വരും തലമുറയ്‌ക്കും മാതൃകായകുമെന്ന അദ്ദേഹം ആശംസിച്ചു. ഭരണഘടനയോടുള്ള ബഹുമാനത്തിനും അംബേദ്കറിനോടുള്ള ബഹുമാനത്തിനും ഇതിലും മികച്ച ഉദാഹരണമില്ലെന്നും അദ്ദേഹം കൂട്ടിച്ചേർത്തു.
സമത്വത്തിനും മനുഷ്യാവകാശങ്ങൾക്കും സാമൂഹിക നീതിക്കും വേണ്ടി ജീവിതം മുഴുവൻ സമർപ്പിച്ച മികച്ച രാഷ്‌ട്രതന്ത്രജ്ഞനാണ് അംബേദ്കറെന്ന് കേന്ദ്ര മന്ത്രി അനുരാഗ് ഠാക്കൂർ പറഞ്ഞു. പാർശ്വവൽക്കരിക്കപ്പെട്ടവരുടെയും സാമൂഹികമായി അടിച്ചമർത്തപ്പെട്ടവരുടെയും മുഖമുദ്രയായിരുന്നു അദ്ദേഹം. അദ്ദേഹത്തിന്റെ ജീവിതവും സ്വാധീനവും ആധുനിക ഇന്ത്യയുടെ നിർമ്മാണത്തിൽ വലിയ സ്വാധീനം ചെലുത്തുന്നു.അദ്ദേഹത്തിന്റെ ആശയങ്ങളും ഇടപെടലുകളുമാണ് രാജ്യത്തിന്റെ അടിത്തറ പാകിയതെന്നും ഠാക്കൂർ കൂട്ടിച്ചേർത്തു.
Comments